Shahanda qaıtys bolǵan ot jaǵýshynyń otbasyna mıllıon teńge bólinedi
QARAǴANDY. QazAqparat - Qaıyrymdylyq kómek qory Shahtınsk qalasy mańynda ornalasqan Shahan kentinde kópqabatty úıdegi jylý qazandyǵynyń jarylýy boıynsha atyshýly istiń kýágeri, qaza tapqan ot jaǵýshynyń otbasyna mıllıon teńge bólinedi, dep habarlaıdy «QazAqparat» HAA tilshisi.
«Tótenshe jaǵdaılardyń saldarynan zardap shekken tulǵalarǵa arnalǵan kómek qory» jeke qaıyrymdylyq qorynyń dırektory Erlan Kerimqulov habarlaǵandaı, qamqorshylyq keńesiniń otyrysynda ot jaǵýshynyń jesiri men eki jas qyzyna mıllıon teńge bólý týraly sheshim qabyldandy.
«Qarjy solardyń bank shotyna aýdarylady. Biz shot ashyp, rekvızıt alýǵa kómektesemiz. Sondaı-aq, bank ákimshiliginen qyzmet kórsetkeni úshin komıssııalyq aqshany ustap qalmaýyn suraımyz», - dep habarlady Kerimqulov.
Erlan Kerimqulov atap ótkendeı, qaza tapqan ot jaǵýshy jylý qazandyǵynyń jarylýyna kináli emes.
«Quqyq qorǵaý organdary ot jaǵýshynyń kinásin anyqtamady. Qazirgi tańda jesir men onyń eki jas qyzy jylý qazandyǵy jarylǵan besqabatty turǵyn úıdiń turǵyndary sekildi zardap shegýshi bolyp tabylady», - dedi Erlan Kerimqulov.
