Shahan Joldasbaev: Armanym - Aqtóbeni qoljetimdi qalaǵa aınaldyrý
Uzaq ýaqyt boıy tynbaı jattyǵý jasap, saýyqtyrý satysynan ótken ol týystarynyń, jaqyndarynyń, dostarynyń, janashyrlarynyń qoldaýymen sportshy atandy, kásipker boldy. Qoǵam belsendisi arbaǵa tańylyp, úıine únsiz qamalǵan talaı janǵa kúsh syılady, dep habarlaıdy QazAqparat tilshisi.
Shahan Joldasbaevtyń esimi aqtóbelikterge jaqsy tanys. Ol qoǵamdyq sharalarǵa jıi qatysady, óz oıyn erkin aıtyp, jolynda kezdesken kedergilermen bólisedi. Qoǵamnyń teń múshesi bul jetistikke ońaı qol jetkizgen joq. Ter tókti, bos ýaıymǵa salynbaı eńbektendi.
Aqtóbe qalasy, Sazdy aýylynda ósip, ózenge alańsyz shomylyp, er jetken Shahan Joldasbaev bala kezden óte alǵyr, alǵa maqsat qoıyp, oǵan qol jetkizý jolyn biletin edi. Ol orta mektepti úzdik attestatpen bitirgen soń Qazaqstan kólik jáne kommýnıkatsııa akademııasynyń Aqtóbe oblystyq fılıalyna oqýǵa tústi. Eki jyldan soń Almaty qalasyna baryp, oqýdy jalǵastyrý oıynan aınyǵan ol Qudaıbergen Jubanov atyndaǵy Aqtóbe memlekettik ýnıversıtetine aýysyp, ınjener-tehnıkalyq fakýltetin bitirdi. Qurylys kompanııasyna ınjener-mehanık bolyp jumysqa ornalasyp, keıin ásker qataryna shaqyrylyp, Otan aldyndaǵy boryshyn abyroımen ótep keldi. Aqtóbege qaıta oralǵan jas jigit ósip, órkendep kele jatqan Astana qalasyn baǵyndyrýdy armandady. Arman qýyp elordaǵa baryp, Qorshaǵan ortany qorǵaý mınıstrligi janyndaǵy aqparattyq-taldaý ortalyǵynyń mamany bolyp jumys istedi. 2007 jyly ony kólik qaǵyp ketip, Shahan Joldasbaevtyń moıyn omyrtqasy zaqymdandy. Aýrýhana kereýetinde oıanyp, aıaq-qolyn qımyldata almaǵan ol birneshe jyl emdeldi, saýyqtyrý kesheninde densaýlyǵyn shyńdady.
«Jol apatyna túsip, aıaq-qolym jansyzdanǵan kezde ómirden túńilgen kúnderim boldy. Belsendi, armany asqaq adamnyń bir sátte múgedek arbasyna tańylǵanyn kórý qıyn ári aıtsa sengisiz jaıt. Sol jaǵdaıdy bastan ótkergen men de úıde otyryp, qoǵamnan alshaqtap qaldym. Dalaǵa shyǵyp, adamdarmen aralasqym kelmedi. Ýaqyt emshi. Men tuńǵıyqtan shyǵa bildim. Serpilip emdeldim, saýyqtyrý keshenderine bardym. Reseıge baryp, qolymdy qımyldatýǵa, arbaǵa otyrýǵa jaǵdaı jasaldy. Bári úlken kúsh pen jigerdi talap etti. Aqtóbe kelgen soń qalalyq sal aýrýyna shaldyqqandardyń quqyǵyn qorǵaý ortalyǵyna baryp, Quralaı Bazarbaıqyzymen tanystym. Ol meni ómirge qaıta ákeldi, ózime degen senimdilikti arttyrdy, jigerimdi janydy. «Shahan, úıde tyǵylyp otyraǵanyńdy jan-jaǵyńdaǵy adamdardyń bári biledi. Ony eshkimnen jasyra almaısyń. Al eger sen jumys istep, eńbektenseń tańerteń kólik kelip, keńsege aparady. Bul jaqsy emes pe?» dedi. Bul sóz meniń bar oıymdy ózgertti»,- dedi Shahan Joldasbaev.
Dál sol kezdesý Shahannyń bar ómirin ózgertip, armanyn ushtaı tústi. Ol qoǵam ómirine belsene aralasyp, mádenı, sporttyq sharalarǵa jıi qatysty. 2011 jyly áriptesterimen Qyrymǵa baryp, saýyqtyrý ortalyǵynda teńizge tústi. Shahannyń júze alatynyn kórgen áriptesi Gúlmıram Srajova jattyǵý jasap, júzýden ótetin jarystarǵa qatysýǵa keńes berdi. Emdeýden kelgen soń yńǵaıly basseın izdep, zaýyt jumysshylaryna arnalǵan sport keshenine jazyldy. 2012 jyly oblystyq, keıin respýblıkalyq jarysqa bardy. Alǵashynda 300 adam qatysqan el birinshiliginen júldesiz oralǵan sportshy yntalanyp, jeńiske jetý úshin basseınge baratyn ýaqytyn bekitti, jıi sport zalǵa bardy. 2014 jyly tirek qımyly zaqymdanǵan adamdar arasynda ótken respýblıkalyq jarysta júzýden qola medal aldy. Bir jyldan soń úsh qashyqtyqta, atap aıtqanda 100 metr arqamen, 50 metr arqamen, 100 metr erkin júzýde aldyna jan salmady. Bul jetistigin 2016 jyly qaıtalap, úsh qashyqtyq boıynsha altyn medal alǵan. Keıin respýblıkalyq satydan ótip, halyqaralyq baıqaýǵa qatysýdy maqsat etti. Bıyl elimizdiń paralımpıada qurama komandasyndaǵy 20 adam Berlınge bardy. Onda 52 elden 600-den astam sportshy baq synaǵan. Sol jarysta qola júldeger atanyp, halyqaralyq sport sheberi ataǵyn aldy.
Shahan Joldasbaev - kásipker. Ol - «Pandýs OK» JShS ıesi. Ol múgedekterdiń kedergisiz júrýi úshin aldymen óz jolynda kezdesken qıyndyqtardy jeńdi. Úıinen shyqqan kezde tabaldyryqqa, kóshede jıektastarǵa, ǵımaratqa kirer kezde pandýsqa tireldi. Jalǵyz ózi eshqaıda bara almady, eshqaıda kirmedi. Keıin «Biz úshin bizsiz qurylys salmańyz!» uranymen Kásipkerlik palatasy uıymdastyrǵan «Atameken-Startup» baıqaýyna qatysty. 2013 jyldyń qarasha aıynda jeńimpaz atanyp, sol jyldyń jeltoqsanynda «Pandýs OK» JShS tirkeldi. Baıqaý jeńimpazyna berilgen 2 mıllıon teńgege orgtehnıka, pandýs tsehyna qajetti dánekerleý quralyn satyp alyp, qujat rásimdedi.
«Pandýs salý úshin arnaıy lıtsenzııa qajet eken. Qurylys-montaj jumystaryn júrgizetin tehnıka, qural-jabdyq, óndiris nysany bolý mindetteldi. Ózim ınjener-tehnıkalyq fakýltetti bitirgen soń mamandyǵymnyń paıdasy tıdi. Qurylys salasynda jumys isteıtin dostarym, týystarym bar. Olar kómek berdi, qujattar jınaý úshin talaı kabınetke kirip, Halyqqa qyzmet kórsetý ortalyǵyna da bardym. Bárinde múgedekterdiń kirip-shyǵýy qıyn. 2014 jyly lıtsenzııaǵa qol jetkizim, tamyzda Aqtóbe oblystyq jumyspen qamtý jáne áleýmettik baǵdarlamalar basqarmasynyń ǵımaratyna pandýs saldym. Keıin Aqtóbe oblysynyń ákimdigine de pandýs jasaldy. Uzyndyǵy - 24 metr. Kóp ǵımarattyń aldyńǵy jaǵynda pandýs salýǵa arnalǵan jer az. Sondyqtan arnaıy kóterme alý jumystary júrdi. Tasymaldaǵanda sapaly kóterme baǵasy qymbat boldy. Arzany - capasyz ári qaýipti. Sodan soń kótermeni óndiristik tseh ishinde jasaýǵa sheshim qabyldadym. 2017 jyly arnaıy sertıfıkat aldym. Qazir elektrli kóterme shyǵaramyz. Seriktestik jumysqa kiriskennen beri 10-nan astam pandýs saldyq. Barlyǵy 7 ǵımaratqa kóterme qondyryldy. Qurylys kompanııasy 18 kótermege tapsyrys berdi. Qarasha aıynda turǵyn úı qoldanysqa beriledi. Bul úılerdiń bári múgedekter úshin qoljetimdi bolady»,- dedi kásipker.
Sportshy, kásipker Shahan Joldybaev ár kúnin josparlaıdy. Tańerteń jumysqa baryp, ózi taǵdyrlas jandarǵa jattyǵý jasaýdyń qyr-syryn úıretedi. Aqtóbe qalalyq sal aýrýyna shaldyqqandardyń quqyǵyn qorǵaý ortalyǵyna tıesili ǵımarat ishindegi jattyǵý zalynda sońǵy 4 jylda 300-den astam múgedek saýyqtyrý satysynan ótken. Olardyń bárine Shahan Joldasbaev kómektesedi, ol óz tájirıbesimen bólisedi. Az ýaqyt jattyqtyrýshy bolyp, kelýshilerge aqyl-keńes beretin ol bir buryshta turǵan jumys ústeline otyryp, tender qujattaryn retteıdi. Túski mezgilde úsh saǵatyn basseınge arnaıdy. Keıin kómekshisimen birge óndiristik tsehti aralap, jumysty qaraıdy. Onda barlyǵy 4 adam jumys isteıdi.
«2015 jyly Qazaqstandaǵy AQSh elshiligi habarlasyp, qurama shtatty kórýge usynys jasady. Qoljetimdi ortany kórý, múgedekterge yńǵaıly jaǵdaı jasaǵan qalalarmen tanysý, amerıkandyq múgedekterdiń tynys-tirshilin baǵamdaý sapary kezinde 4 shtat, 5 qalada boldym. Astanasy Vashıngton qalasyna da bardym. Ómirimde alǵash ret qala ishinde múgedekterdiń erkin qozǵalatynyn kórdim. Arbaǵa tańylǵandar kóp. Bári erkin júredi, jumysqa barady. Tańyrqadym, tamsandym. Meniń júzimdi kórgen amerıkandyqtar «sizderde de múgedekter bar, qoljetimdilik tómen bolǵan soń olar kórinbeıdi» dep jaýap qaıtardy. Shyn máninde solaı. Arbaǵa tańylǵan jandar óz problemasymen jalǵyz qalady. Armanym - Aqtóbeni qoljetimdi qalaǵa aınaldyrý»,- dedi ol. Qıyn kúnderi demep, kedergiler kezdesse keńes berip, kómektesetin serigi, dostary, janashyry bar Shahan Joldasbaev bar kúsh-jigerin jarqyn bolashaqqa arnaıdy. Ol kedergini jeńe bilgen adam. 
