Shahan turǵyndary Májilisten kentte jylý qazandyǵyn salýdy surady
QARAǴANDY. QazAqparat - Qazandyqtyń jarylýy saldarynan apat bolǵan Qaraǵandy oblysyndaǵy Shahan kentiniń turǵyndary bılikten jylytý qazandyǵy qurylysynyń máselesin tezirek sheshýdi surady, dep habarlaıdy «QazAqparat» HAA tilshisi.
Osyndaı máseleni shahandyqtar qaza tapqandardyń jerleý rásiminde kóterdi. Belsendiler kóńil aıtyp kelgen oblys ákimi Nurmuhambet Ábdibekovke kenttegi qazandyqty tezirek salýdy ótindi.
«Halyqtyń qansha ekenin kórip tursyz ǵoı, tezirek qazandyq salyp berińizder! Qazandyq bolǵanda, osynsha adam kóz jumbas edi», - dep málimdedi zeınetker Galına Stolıarova.
Turǵyndardyń aıtýynsha, Shahanda buryn da jylý qazandyǵy saldarynan apattar bolǵan. Turǵyndar Májilis depýtaty men Shahtınsk ákimine ótinish jasady.
«Bul apat toǵyz adamnyń, sonyń ishinde úsh balanyń ómirin jalmady. Árbir shahandyq orny tolmas qaıǵyǵa dýshar boldy. Eger Shahanda jobalyq-smetalyq qujaty saraptamadan ótken qazandyq salynǵanda, bul jaǵdaıdyń aldyn alýǵa bolar edi. Qazandyqtyń qurylysy 2013 jyly josparlanǵan, alaıdy bıýdjet tapshylyǵynan keıinge qaldyrylyp keledi. Bul máseleni úkimettik deńgeıde sheshýlerin talap etemiz», - delingen aıtylady úndeýde.
Eske sala keteıik, 1 qańtar kúni 22:40-ta Qaraǵandy oblysy TJD qutqarý bólimine Shahtınsk qalasy Shahan aýylyndaǵy kópqabatty úıdiń bir bóligi opyrylyp túskeni týraly qońyraý shalynǵan. Oqıǵa ornyna shuǵyl túrde TJD qutqarýshylary jóneltilip, turǵyndar evakýatsııalandy.
Úıindilerdi tazartýǵa 280 adam jumyldyrylǵan , olardyń qatarynda qutqarýshylar, polıtsııa qyzmetkerleri, jergilikti atqarýshy organdar, jedel medıtsınalyq járdem brıgadasy, Ulttyq ulannyń 52859 áskerı bóliminiń aýyr tehnıkasy jáne jeke kásipkerler bar.
Bul kópqabatty úıde 118 turǵyn mekendegen, al TJ oryn alǵan kezde qulaǵan bólikte shamamen 30 adam bolǵan.
Buǵan deıin habarlanǵandaı, úıindi astynan 9 kóz jumǵan adamnyń denesi arshyp alyndy. Onyń úsheýi er adam, úsheýi áıel, úsheýi bala. Balanyń bireýi 2016 jylǵy, ekinshisi 2010 jylǵy. 
Shahan kentinde qıraǵan turǵyn úıge qatysty QR QK-niń 292-babynyń 3 tarmaǵy (Adam ólimine ákep soqtyrǵan órt qaýipsizdigi talaptaryn buzý) boıynsha qylmystyq is qozǵaldy .
Qaıtys bolǵandardy jerleý rásimi 3-7 qańtar arylyǵynda ótedi dep jarııalandy. Sondaı-aq ákimdik jerleý men as berý rásimderine qajetti shyǵyndardy óteıtindigi de málim boldy. Buǵan qosa bılik ókilderi qurban bolǵandar men zardap shekkenderge materıaldyq kómek kórsetetin bolady.
