Shahan turǵyndary depýtattarǵa óz problemalaryn aıtty
QARAǴANDY. QazAqparat - Májilis depýtattary, «Nur Otan» partııasy fraktsııasynyń músheleri Nurlan Dýlatbekov, Snejanna Imasheva jáne ıÝrıı Tımoşenko búgin Qaraǵandy oblysy Shahan kentine bardy, dep habarlady «QazAqparat» HAA tilshisi.
Depýtattar aldymen qazandyqtyń jarylýy saldarynan qulaǵan úıdi kórdi. Olardy bul jerde Shahtınsk ákimi Serjan Aımaqov kútip aldy. Qala basshysy jaǵdaıdy baıandady, qalpyna keltirý jumystary, zardap shekkenderge qandaı kómek kórsetilgeni jaıynda aıtyp berdi.
«4-14 qańtar aralyǵynda óńirlerge jumys saparyn josparladyq. Apatqa baılanysty birinshi Shahanǵa kelýdi sheshtik. Kóńil bildirý úshin, gýmanıtarlyq kómek kórsetip, turǵyndardyń bastamashyl tobymen kezdesip, olardy tyńdaý úshin keldik. Endi problemalardy egjeı-tegjeıli saralap, sosyn áreketke kóshemiz», - dedi Májilis depýtaty Nurlan Dýlatbekov.
ıÝ. Tımoşenko Shahtınsk ákimimen áńgimelesý barysynda, jylytý júıesin túgendeý qajettigin aıtty. «Basqa úılerge de osyndaı qondyrǵy qoıylǵan. Ázirge tergeý júrip jatyr, bul jerde tehnıkalyq jáne adam faktory týyndady. Jabdyqtardyń qandaı dárejede ekenin, qyzmetkerlerdiń daıyndyq deńgeıin tekserý qajet», - dep sanaıdy depýtat.
Sodan keıin ákimdikte jergilikti belsendilermen kezdesý boldy.
«Sizdermen birigip bul apattyń aldyn alýǵa bolatyn edi. Sizderdi saıladyq, búgin bizdiń kókeıkesti máselelerimizdi tyńdap, óz saılaýshylaryńyzdy qutqarý sheshimin qabyldaıdy dep senemiz. Sebebi adamdar áli de osyndaı úılerde turyp jatyr. Mundaı qazandyqtar jeterlik», - degen oıyn bildirdi jergilikti qoǵamdastyq tóraǵasy Sapar Ibkeev. - Bizge qazandyq kerek. Bul týraly surap ótingimiz kelmeıdi, talap etemiz. Osy máseleni úkimettik deńgeıde sheshýge járdemdesýlerińizdi suraımyz».
Kinálini izdeý aqylǵa syımaıdy, dedi belsendi. «Barlyǵymyz kinálimiz. Qaza tapqandardyń aldynda bárimiz de jaýaptymyz. Endi aman qalǵan adamdar aldynda jaýapkershiligimizdi umytpaıyq».
Depýtattar belsendilermen jylytýǵa baılanysty sheshimderdiń balamaly nusqalaryn talqylady.
