Shahan kentinde 24 úı ortalyq jylý júıesine qosylýǵa daıyn - Qaraǵandy oblysy
QARAǴANDY. QazAqparat – Qaraǵandy oblysynyń Shahan kentinde ortalyq qazandyqtyń qurylysy aıaqtalýǵa jaqyn, dep habarlaıdy QazAqparat tilshisi.
Qaraǵandy oblysynyń ákimi Jeńis Qasymbek shahandyqtarmen kezdesip, turǵyn úılerdi ortalyqtandyrylǵan jylýǵa qosý josparyn talqylady. Kent turǵyndaryn eń aldymen, úıishilik jeliler qalaı júrgiziletini qyzyqtyrdy.
Jeńis Qasymbek kópqabatty úılerdi «Qazaqstandyq turǵyn úı-kommýnaldyq sharýashylyǵyn jańǵyrtý jáne damytý ortalyǵy» esebinen qosý josparlanǵanyn túsindirdi. Baǵdarlamaǵa qatysý úshin úıdegi páter ıeleriniń 70% kelisim berýi tıis. Búgingi tańda 24 úı qosylýǵa daıyn.
Aımaq basshysy osy máselege jaýapty bolyp, maýsym aıynda alǵashqy úılerge barlyq qajetti kommýnıkatsııalardyń jetkizilýin jedeldetýdi tapsyrdy.
Sondaı-aq, oblys ákimimen kezdesýde Shahan kentiniń turǵyndary kópirler men joldardy jóndeý sııaqty basqa da máselelerdi kóterdi. Jospar boıynsha osy jyly eki kópirdiń jáne Qaraǵandy – Saran – Shahtınsk jolynyń 19 shaqyrymynyń qurylysy aıaqtalady.
Jumys sapary barysynda Jeńis Qasymbek Botaqara kentinde de bolyp, turǵyn úıler men 320 oryndyq DSK qurylysymen tanysty.
Bıylǵy jyly 10 kóppáterli turǵyn úıdi paıdalanýǵa berý jáne qaıtalama turǵyn úı satyp alý esebinen halyqtyń áleýmettik osal toptary men kóp balaly otbasylar retinde kezekte turǵan Botaqara kentiniń 330 otbasyn turǵyn úımen qamtamasyz etý josparlanýda.
Dene shynyqtyrý-saýyqtyrý kesheni aýdan ortalyǵynda «Aýyl – el besigi» baǵdarlamasy boıynsha salynýda. Ǵımarattyń qańqasy turǵyzylyp, árleý jumystary júrgizilýde. Olar jumysty kúzge deıin aıaqtaýdy josparlap otyr.
Eske salaıyq, Shahan kentinde ortalyq qazandyq salynyp jatqanyn buǵan deıin jazǵan edik. Turǵyndarǵa kópqabatty úılerdegi peshterden arylý múmkindigi týmaq.
2017 jyldyń 1 qańtarynda Shahan kentinde kópqabatty úı opyrylyp qulaǵan bolatyn. Úıindiler astynan 9 adamnyń máıiti tabyldy. Úıdiń qulaýyna 4-shi podezdiń jertólesinde ornalasqan qazandyqtyń jarylýy sebep bolǵan.
