Shaǵyn jáne orta bıznestiń jalpy ishki ónimdegi úlesi 33,5 paıyzǵa jetti – Úkimet basshysy
«Kásipkerlikti damytý jónindegi ulttyq joba shaǵyn bıznesti sapaly damytýǵa jáne orta bıznesti nyǵaıtýǵa baǵyttalǵan. Basty maqsat – halyqty jumyspen qamtyp, kásipkerlik sýbektileriniń bárine birdeı, teń jaǵdaı jasaý. Bul úshin memleket bıznesti júrgizýdiń ashyq jáne túsinikti erejelerin qabyldap otyr. Úkimet «Atameken» palatasymen birlesip, kásipkerlik qyzmet salasyna jańa retteý saıasatyn engizý boıynsha aýqymdy jumys atqaryp keledi. Adamı faktorlardyń áserin barynsha azaıtý úshin memlekettik baqylaýda táýekelderdi basqarý jáne baǵalaý júıesin avtomattandyrý boıynsha keshendi sharalar qabyldanap jatyr», - dedi Á. Smaıylov.
Onyń paıymynsha, reformany «taza paraqtan bastap» júzege asyrý bıznes-ortany retteýdiń tıimdiligin arttyryp, kásipkerlerge qolaıly jaǵdaılar jasaıdy.
«Biz Úkimettegi otandyq kásipkerler keńesinde kólik, energetıka, agroónerkásip salasyndaǵy bıznestiń problemalaryn, iskerlik jáne ınvestıtsııalyq ahýaldy jaqsartý, sondaı-aq ekonomıkanyń basqa da salalaryndaǵy máselelerdi turaqty túrde qarap otyrmyz. Búginde Úkimet pen bıznes arasynda júıeli ári konstrýktıvti dıalog ornady dep aıtýǵa bolady», - dedi Úkimet basshysy.
«Bıyl shaǵyn jáne orta bıznestiń jalpy ishki ónimdegi úlesi 33,5 paıyzǵa jetti. Kásipkerlik sýbektileriniń sany 1,4 mln boldy. Shaǵyn jáne orta bızneste jumyspen qamtylǵandardyń jalpy sany 3,5 mln adamdy qurap otyr. Bizdiń maqsatymyz – kásipkerlik qurylymyndaǵy sapaly ózgeristerge qol jetkizý», - dedi Premer-Mınıstr.