Shaǵyn jáne orta bıznesti jeńildikpen kredıtteýge 600 mlrd teńge bólindi – Ulttyq bank
ALMATY. QazAqparat - Ulttyq bank QR Qarjy naryǵyn retteý jáne damytý agenttigimen birlesip shaǵyn jáne orta kásipkerlik sýbektilerin jeńildikpen kredıtteý baǵdarlamasyn ázirledi, dep habarlaıdy QazAqparat.
Koronovırýs pandemııasyna jáne onyń Qazaqstan ekonomıkasyna teris yqpalyna baılanysty tótenshe jaǵdaı nátıjesinde zardap shekken shaǵyn jáne orta kásipkerlik sýbektilerin, dara kásipkerlerdi qoldaýǵa arnalǵan Qazaqstan Respýblıkasynyń Prezıdenti Q.K. Toqaevtyń tapsyrmasy boıynsha Ulttyq bank QR Qarjy naryǵyn retteý jáne damytý agenttigimen birlesip Shaǵyn jáne orta kásipkerlik sýbektilerin jeńildikpen kredıtteý baǵdarlamasyn ázirledi.
«Atalǵan baǵdarlamany iske asyrý úshin ekinshi deńgeıdegi bankterde negizdelgen salymdardy ornalastyrý arqyly 600 mlrd teńge bólindi. Bıznesti qoldaý tetigi ekinshi deńgeıdegi bankterdiń tótenshe jaǵdaıdyń engizilýi nátıjesinde zardap shekken shaǵyn jáne orta kásipkerlik sýbektilerine, dara kásipkerlerge 12 aıǵa deıingi merzimmen jyldyq 8%-dan aspaıtyn mólsherleme boıynsha aınalym qarajatyn tolyqtyrýǵa jeńildikpen kredıtter berýi arqyly iske asyrylady. Ekinshi deńgeıdegi bankterdiń qarajatty ıgerý merzimi 3 aı», delingen Ulttyq bank taratqan habarlamada.
Jeńildikpen kredıtteý baǵdarlamasynyń operatory bolyp Ulttyq bank janyndaǵy «Qazaqstannyń ornyqtylyq qory» AQ aıqyndaldy, sondaı-aq aktıvter sapasyn táýelsiz baǵalaýdan (Asset Quality Reviews) ótken jáne portfelinde shaǵyn jáne orta kásipkerlik sýbektilerine berilgen qaryzdary bar 13 qatysýshy bank belgilendi.
«Baǵdarlamaǵa qatysýshy bankterdiń bólingen qarajatty memlekettik jáne memlekettik emes baǵaly qaǵazdardy satyp alýǵa, basqa bankterdegi depozıtterge ornalastyrýǵa, shetel valıýtasyn satyp alýǵa paıdalanýyna jáne ózge maqsatqa saı paıdalanbaýyna tyıym salynady.
QR Qarjy naryǵyn retteý jáne damytý agenttigi «Qazaqstannyń ornyqtylyq qory» AQ-pen birlesip kásipkerlerge berilgen jeńildikti kredıtterdiń ýaqtyly jáne nysanaly paıdalanylýyna aı saıynǵy negizde monıtorıng júrgizetin bolady», delingen habarlamada.
Ulttyq banki bólingen qarajattyń sońǵy qaryz alýshyǵa jetkizilýi boıynsha barlyq qajetti sharalardy qabyldaıtyn bolady.
