Shaǵyn jáne orta bıznesti tekserýge qatysty zańnamany reformalaý qajet - Elbasy
ASTANA. Aqpannyń 26-sy. QazAqparat /Ernur Aqanbaı/ - Elbasy Nursultan Nazarbaev shaǵyn jáne orta bıznesti tekserýge qatysty zańnamany reformalaý qajet dep esepteıdi. Elbasy bul oıyn búgin Aqordada ótken QR Prezıdenti janyndaǵy kásipkerler keńesiniń 1-shi jalpy otyrysynda bildirdi,
dep habarlaıdy QazAqparat.
«Shaǵyn jáne orta bıznesti zańnamany buzǵany úshin qylmystyq qýdalaýshylyqtan qorǵaı otyryp, shaǵyn jáne orta bızneske qatysty zańnamanyń bıznesti júrgizý bóligine ózgerister engize otyryp, zańnamany reformalaý qajet. Bundaı zań buzýshylyqtar úshin aıyppul salý praktıkasyn keńinen qoldanǵan jón», dedi otyrysta N. Nazarbaev.
Elbasynyń aıtýynsha, shaǵyn jáne orta bıznestiń qatysýyndaǵy sharýashylyq daýlardy aralyq sottardyń quzyryna berý qajet. Bul sharalar quqyq qorǵaý organdarynyń qoldarynan «quqyqtyq dýbınkany» alýǵa múmkindik beredi.
Elbasy bul rette shaǵyn jáne orta bızneske tekserý júrgizý quqyǵyn tek qana salyq organdaryna berýge bolatynyn aıtty. Alaıda bul rette mundaı tekserýlerdi júrgizýdiń tártibi men erejesi naqty rettelýi tıis. «Shaǵyn jáne orta bıznestiń ortasynda Qazaqstannyń zańnamasyn múltiksiz saqtaý jónindegi jeke múddeni qalyptastyrý qajet», dedi Memleket basshysy.
