Shaǵyn jáne orta bıznesti qoldaýǵa nazar aýdarý kerek - Tımýr Jaqsylyqov
«Daǵdarys barlyq salany qamtyp, ekonomıkalyq ósimniń túrli aspektilerine tosqaýyl boldy. Barsha álem tıisti deńgeıde turaqtylyqty saqtaýǵa tyrysty. Bastapqy kúsh-jiger ınfektsııanyń taralaýy múmkindigine tosqaýyl qoıýǵa shoǵyrlandy. Birinshi kezeńde indettiń taralýyn shekteý turǵysynda nashar nátıje kórsetken elder ekinshi kezeńde vaktsınalaýdyń arqasynda jaqsy kórsetkishterdi baıqatty. Qazaqstandaǵy jaǵdaı qandaı? Árıne, vaktsınalaý qarqyn alyp kele jatqany belgili. Úkimet kúzge qaraı josparlanǵan kórsetkishterge qol jetkizip, osy arqyly ınfektsııanyń taralýyn shekteýdi eskerip otyr. Ekonomıkalyq kúsh-jiger salasynda shaǵyn jáne orta bızneske negizdelgen qadamdar eleýli róldi baıqatty. Sebebi shaǵyn jáne orta bızneske aýyrtpalyq joǵary bolady. Eger ózge elderdiń tájirıbesine qarasaq, olar da osyǵan asa kóńil bóldi», - dedi T. Jaqsylyqov «Astana FINANCE DAYS 2021 konferentsııasy aıasyndaǵy sessııa jumysynda.
Onyń aıtýynsha, Qazaqstan da óziniń kúsh-jigeriniń eleýli úlesin atalǵan sektordy qoldaýǵa baǵyttady.
«Qazirgi kezde bizde ońtaıly nátıjeni kórip turmyz. Shaǵyn jáne orta bıznestiń ónim shyǵarýy qysqarmady. Belsendi kásiporyndar sany azaımaıdy. Qyzmet kórsetý salasyna baılanysty ekonomıka segmentinde qysqarý boldy. Bárinen buryn saýda, qoǵamdyq tamaqtaný sektory zardap shekti. Degenmen vaktsınalaý qarqyny ilgerilegen saıyn ahýaldyń jaqsarýy jalǵasady degen oıdamyz», - dedi vıtse-mınıstr.
Onyń paıymynsha, shaǵyn jáne orta bıznesti qoldaýǵa erekshe nazar aýdarý kerek, ıaǵnı ekonomıkada jumys oryndaryn saqtaý maqsatyndaǵy daǵdarysqa qarsy qoldaý qadamdary mańyzdy. Sonymen qatar, densaýlyq saqtaý júıesine aldaǵy ýaqytta kóp kóńil bólgen jón.