Shaǵyn jáne orta bıznesti qoldaýǵa 424 mlrd teńge bólinedi – Úkimet

NUR-SULTAN. QazAqparat – QR Premer-Mınıstri Asqar Mamın bıznesti qoldaý jónindegi daǵdarysqa qarsy sharalar týraly aıtyp berdi, dep habarlaıdy QazAqparat.

«Shaǵyn jáne orta bıznesti qoldaý – ekonomıkanyń ornyqtylyǵyn qamtamasyz etetin mańyzdy faktorlardyń biri. Bıylǵy birinshi jartyjyldyqta qarapaıym zattar ekonomıkasy baǵdarlamasy aıasynda 142 mlrd teńgeni quraıtyń 334 jobaǵa qoldaý kórsetildi. Jyl aıaǵyna deıin 424 mlrd teńge bolatyn 724 jobaǵa qoldaý kórsetý josparda bar», - dedi Asqar Mamın Úkimet otyrysynda.

Bıznestiń jol kartasy aıasynda da bul kezeńde 492 mlrd teńge bolatyn 23 myń jobaǵa qoldaý kórsetildi.

«Jyl sońyna deıin 1,2 trln teńgeni quraıtyń 32 myń jobaǵa qoldaý kórsetiledi. Osy eki baǵdarlama aıasynda 90 myń jumys oryny qamtylady. Bıznesti qoldaýdy eń kóp qajet etetin baǵyttar – saýda, qyzmet kórsetý salasy, óńdeýshi ónerkásip, kólik jáne qoıma, sondaı-aq qurylys salasy.

Búginde baǵdarlamalar aıasynda kásipkerlerdi qoldaýǵa bólingen 1 teńge sýbsıdııa bıýdjetke salyqtyq túsim túrinde 6 ese bolyp qaıtady. Pandemııa jaǵdaıynda bıznesti qoldaý úshin Úkimet «Atameken» ulttyq kásipkerler palatasymen birlesip ázirlengen daǵdarysqa qarsy sharalar tıimdiligin kórsetti. Osy baǵdarlamalar boıynsha josparlanǵan barlyq sharalar jyl aıaǵyna deıin tolyq iske asyrylýy kerek», - dep tapsyrma berdi Premer-Mınıstr.