Shaǵyn jáne orta bıznes QR ekonomıkasynyń ósýine yqpalyn tıgizedi — Dúnıejúzilik bank

- Qazaqstan men Dúnıejúzilik banktiń yntymaqtastyǵy shırek ǵasyrdan asady. Osy jyldar ishinde bizdiń elimizde qandaı iri jobalardy iske asyrý múmkin boldy?

- Qazaqstanda uzaq ýaqyttan beri QR Úkimetimen seriktespiz. Energetıka, avtomobıl joldary tárizdi sektorlarǵa kóńil bólemiz. Densaýlyq saqtaý salasynda da jobalarymyz bar.

DB «Batys Eýropa-Batys Qytaı» halyqaralyq tranzıttik dálizi boıyndaǵy kólik jáne saýda aǵyndarynyń tıimdiligin arttyrýdy qoldaıdy. Onyń ishinde Qyzylorda, Ońtústik Qazaqstan, Almaty oblystarynda uzyndyǵy 1445 shaqyrym bolatyn joldardyń qurylysy bar. Qurǵaqshylyq bolǵan 2012 jyly QR-da resýrsty únemdeıtin «topyraqty nóldik óńdeý» tehnologııasyn qoldaný bıdaı óndirisin shamamen 0,7 mln tonnaǵa arttyrýǵa múmkindik berdi, bul 5 mln adamdy azyqtandyrý úshin jetkilikti.

Elektr energııasyn jetkizý boıynsha úsh joba soltústik aımaqty ońtústik aımaqpen baılanystyrýǵa múmkindik berdi. Bul ońtústik óńirde qys mezgilindegi energııa tapshylyǵyn joıdy.

Orman jobasy Aral teńiziniń qurǵap qalǵan túbinde 56 000 ga sekseýil ormanyn otyrǵyzýǵa qoldaý boldy. Bul qumdardyń syrǵýyn turaqtandyrý men tuz tozańyn shyǵarýǵa oń áserin tıgizdi.  

DB Qazaqstanda densaýlyq saqtaý reformasynyń keshendi strategııasyn iske asyrýǵa qoldaý bildirdi, bul qarjylandyrý, medıtsınalyq kómek sapasyn arttyrý, densaýlyq saqtaýdy basqarý boıynsha aqparattyq júıeler, medıtsınalyq bilim berý jáne ǵylym, farmatsevtıkalyq saıasat jáne tamaq ónimderiniń qaýipsizdigi máselelerin qamtıdy.

Óskemenniń qorshaǵan ortasyn qalpyna keltirý boıynsha joba jerasty sýlaryna ónerkásip qaldyqtarynyń lastaǵysh zattarynyń túsýin tejeýge, sonymen qatar jerasty sýlarynyń sapasyna monıtorıng úshin ınstıtýtsıonaldyq mehanızmderdi nyǵaıtýǵa kómek berdi.

Dúnıejúzilik bank qoldaý kórsetip otyrǵan «BOTA» qoǵamdyq qory Qazaqstandaǵy az qamtylǵan otbasylardyń balalarynyń ómirin olardyń bilimine, densaýlyǵy men áleýmettik qorǵalýyna qarjy salý arqyly jaqsartýǵa baǵyttalǵan kóptegen jobalardy súıemeldedi.

-  «Doing Business» reıtınginde sońǵy 10 jyl ishinde Qazaqstan 64-inshi orynnan 36-ynshy orynǵa kóterildi. Sizdiń oıyńyzsha, buǵan ne yqpal etti jáne DB-nyń Qazaqstanǵa qatysty boljamdary qandaı?

- Sońǵy 5-10 jylda Qazaqstan «Doing Business» reıtınginde iskerlik kásiporyndar úshin óz ahýalyn jaqsartýǵa qatysty zor tabystarǵa qol jetkizdi. Bul iri kásiporyndarǵa ǵana emes, shaǵyn jáne orta bızneske de qatysty ekenin aıta ketken jón. Bul ındeks nelikten mańyzdy? Óıtkeni ol Qazaqstanda jáne basqa da elderde shaǵyn jáne orta bıznespen aınalysý qanshalyqty jeńil ekenin saraptaıdy. Men Qazaqstan bul reıtıngte odan da joǵary oryn ala alady degen oıdamyn, sebebi shaǵyn jáne orta bıznes ekonomıkany odan ári ártaraptandyrýǵa jáne ósimine yqpal etetin bolady.

- Ózińiz biletindeı, jýyrda elordada «Astana» halyqaralyq qarjy ortalyǵynyń resmı ashylýy bolady.  Sizdiń oıyńyzsha, onyń perspektıvalary qandaı?

-AHQO qurý - Qazaqstan úshin Ortalyq Azııa elderiniń qarjylyq habyna aınalýynyń tamasha múmkindigi dep sanaımyn. Bul óte mańyzdy, sebebi Qazaqstan osylaısha, aımaqtaǵy ekonomıkalyq ósimniń draıverine aınala alady. Mundaı jaǵdaıda qarjy ortalyǵyn qurý óte qajet. Biz Dúnıejúzilik bank toby AHQO yntymaqtastyq ornata alady dep úmittenemiz.

- Dúnıejúzilik bank AHQO-men qandaı yntymaqtastyq ornatpaq?

- Bul árıne kapıtaldyń qarjylyq naryqtary qanshalyqty belsendi damıtynyna baılanysty bolady. Desek te, shilde aıynyń basynda ortalyqtyń resmı ashylatyn kezde bizdiń delegatsııamyz oǵan keledi.

- DB men Qazaqstannyń odan arǵy yntymaqtastyǵynyń basty baǵyttaryn atap berseńiz.

- Biz eldiń ekonomıkalyq áleýetin arttyrý, jeke sektordyń ósýi, sonymen qatar adam kapıtalyn kúsheıtý, ıaǵnı adam resýrstarynyń sapasyn jaqsartý boıynsha odan ári yntymaqtastyq ornatý qajet dep sanaımyz.