Shaǵyn jáne orta bıznes ıeleri Japonııada taǵlymdamadan óte alady
Bul týraly Ulttyq ekonomıka mınıstrligi kásipkerlikti memlekettik qoldaý departamenti dırektorynyń orynbasary Mereı Isaeva BUSINESS TECHNOLOGY EXPO 2023 halyqaralyq kórmesiniń aıasynda ótip jatqan bıznes-forýmda málim etti.
«Qoldaýdyń qarjylaı emes túrleri bıznesti aqparatpen, saraptamamen qamtýǵa baǵyttalady. Osylaısha shaǵyn jáne orta bıznes nysandaryna ruqsat alýǵa, sheteldik áriptesterimen iskerlik baılanysty jolǵa qoıýǵa kómek kórsetiledi. Jyl saıyn jetekshi kásipkerlerdi Germanııaǵa eki aptalyq bıznes-taǵlymdamaǵa jiberip kelemiz. Bıyldan bastap Japonııaǵa 10 kásipkerdi taǵlymdamaǵa jiberemiz. Sondaı-aq, Ońtústik Koreıamen de osy másele pysyqtalyp jatyr», - dedi Mereı Isaeva.
Onyń aıtýyna qaraǵanda, «Bıznestiń jol kartasy» men «Qarapaıym zattar ekonomıkasy» baǵdarlamasy iske asqan búkil kezeńniń ishinde shaǵyn jáne orta bıznes nysandary 119 myń jumys ornyn qurǵan.
50 trln teńgeniń ónimin shyǵaryp, bıýdjetke 3 trln teńge tóledi.
«Bıyldan bastap «Men kásipkermin» deıtin jańa qural paıda boldy. Bul arqyly isin jańa bastaǵan kásipkerlerge bıznestiń álippesin úıretip, sertıfıkat beremiz. Áıelder kásipkerligine arnalǵan jeke baǵyt bar. Sonyń aıasynda 7 qosalqy qyzmet kórsetemiz. Onyń ishine konsýltatsııa, bıznes-tálimgerlik, salalyq oqytý sııaqty asa qajetti sharalar kózdelgen. Sondaı-aq, bıznesti halyqaralyq standarttarǵa saı baǵalaý qyzmeti bar. Halyqaralyq tájirıbege qarap Qazaqstanda shaǵyn jáne orta bızneske kórsetiletin qoldaýdyń teńdessiz ekenin aıtýǵa bolady», - dedi UEM ókili.