Shaǵyn sý kemelerin tekserý jumystary júrip jatyr
ASTANA. 2 shilde. QazAqparat - «Skýter» aktsııasy aıasynda shaǵyn sý kemeleriniń qatysýymen bolatyn qaıǵyly oqıǵalardyń aldyn alý sharalary júrgizilýde.
QR Kólik jáne kommýnıkatsııalar mınıstrligi Kóliktik baqylaý komıtetiniń habarlaýynsha, aktsııa bastalǵaly beri qaýipsizdik erejelerin saqtamaýǵa qatysty 79 quqyq buzýshylyq anyqtalyp, 19 shaǵyn kemeni paıdalanýǵa tyıym salyndy.
Kóliktiń baqylaý komıteti tóraǵasynyń orynbasary Serǵazy Omashtyń aıtýynsha, bıyl shaǵyn sý kemeleriniń qatysýymen birneshe qaıǵyly oqıǵa bolyp, 6 adam qaza tapty. «Negizi, elimizde shaǵyn sý kemeleriniń sany jyl saıyn artyp keledi. 2001 jyly olardyń jalpy sany 10 myń bolsa, 2011 jyly bul kórsetkish úsh ese ósip, 29 myń birlikti qurady», - deıdi ol.
«Skýter» aktsııasy tamyz aıyna deıin jalǵasady. Onyń aıasynda búgin Astanadaǵy Esil ózenimen qatynaıtyn shaǵyn sý kemeleri tekserilip, aqparattyq-túsindirý jumystary uıymdastyryldy.
