Shaǵyn orta bıznesti damytamyz – Mańǵystaý ákimi jańaózendikterdi jumyspen qamtý jaıynda

NUR-SULTAN. QazAqparat - Jańaózen qalasynda shaǵyn jáne orta bıznesti damytý qolǵa alynady. Bul týraly Ortalyq kommýnıkatsııalar qyzmetinde ótken brıfıngte Mańǵystaý oblysy ákimi Serikbaı Trumov aıtty, dep habarlaıdy QazAqparat tilshisi.

«Jyl basynda jumysqa ornalasýǵa qatysty kóshege shyqqan azamattar boldy. Oblystyq ákimdik pen Úkimet baılanys jasap otyr. Qazir «Ózen-Invest» MKK janynan 350 oryndyq jumys orny ashyldy. Odan bólek «Taza sý» kásiporny qurylyp, 90 adamǵa jumys orny ashyldy», - deıdi Serik Trumov.

Onyń aıtýynsha, Jańaózen qalasynda jumyspen qamtýǵa baılanysty máseleler munaı salasynda jumys istegisi keletin adamdar arasynda bolǵan.

«Jańaózen qalasynda 155 myń turǵyn bar. Onyń ishinde jumysqa qabiletti adam sany - 77 myń. «ÓzenMunaıGaz» kompanııasynda 15 myń adam jumys isteıdi. Bárin osy salada jumyspen qamtý múmkin emes, sondyqtan biz «Atameken» ulttyq kásipkerler palatasymen birlese otyryp shaǵyn, orta bıznesti damytýǵa baılanysty jumystardy qolǵa aldyq», - deıdi ol.

Eske sala ketsek, ákimniń aıtýynsha Mańǵystaý oblysynda bıyl 1,2 mln sharshy metr turǵyn úı paıdalanýǵa beriledi.