Shaǵyn nesıege kózdelgen 20 mlrd teńge qalaı bólinedi
ASTANA. QazAqparat - Búgin Úkimet otyrysynda QR Eńbek jáne halyqty áleýmettik qorǵaý mınıstri Mádına Ábilqasymova Elbasynyń shaǵyn nesıeni keńeıtý jónindegi tórtinshi áleýmettik bastamasyn iske asyrýǵa kózdelgen 20 mlrd teńge qalaı bólinetindigin aıtty, dep habarlaıdy QazAqparat.
«Aýyldarda kásipkerlikti damytý úshin bul bastama óte mańyzdy. Osyǵan oraı qosymsha bólingen 20 mlrd teńgeniń 14 mlrd teńgesin aýyldarǵa nesıe berýge, onyń ishinde 10 mlrd teńgeni aýyl shaarýashylyǵy taýarlaryn óndirýshi kásiporyndardyń aınalasynda ıakorlyq kooperatsııalar jobasyn damytýǵa jumsaýdy usynamyz. Bul shaǵyn nesıe alatyndarǵa ónimniń satylýyna kepildik berýdi qamtamasyz etedi. Qalǵan 6 mlrd teńgeni qalalarǵa jáne monoqalalarǵa baǵyttaý josparlanyp otyr»,- dedi mınıstr.
Osy rette ol bólingen qarajatty ýaqytynda ıgerý jáne josparlaýdy qamtamasyz etý úshin respýblıkalyq baǵdarlamalardyń ákimshileri jergilikti atqarýshy organdarmen birlesip, óńirler boıynsha naqty ótinimderdi aǵymdaǵy jyldyń 15 naýryzyna deıin Qarjy mınıstrligine engizýleri qajettigin basa aıtty. Bul oraıda shaǵyn nesıeleý baǵdarlamasynyń aýylda jáne shaǵyn qalalardaǵy ákimshisi Aýyl sharýashylyǵy mınıstrligi, al qalalar men monoqalalarda Ulttyq ekonomıka mınıstrligi bolady.
«Qazirgi tańda shaǵyn nesıeleýdi damytý «Nátıjeli jumyspen qamtýdy jáne jappaı kásipkerlikti damytý» baǵdarlamasy aıasynda iske asyrylýda. Bul baǵyt jappaı kásipkerlikti damytý boıynsha eń tıimdi tetik bolyp tabylady. 2018 jylǵa bekitilgen bıýdjette shaǵyn nesıeleý baǵdarlamasyna 42 mlrd teńge qaralǵan. Onyń 31 mlrd teńgesi aýyldyq jerlerge, 11 mlrd teńgesi qalalar men monoqalalarǵa baǵyttalmaq. Memleket basshysynyń tapsyrmasymen qarjylandyrý 20 mlrd teńgege ulǵaıyp, aǵymdaǵy jyly shamamen 62 mlrd teńgeni quraıdy», - dedi Mádına Ábilqasymova.
Aıta keterligi, Eńbek jáne halyqty áleýmettik qorǵaý mınıstrligi Ulttyq ekonomıka, Aýyl sharýashylyǵy, Qarjy mınıstrlikterimen jáne jergilikti atqarýshy organdarmen birlesip, Elbasynyń shaǵyn nesıeni keńeıtý jónindegi tórtinshi áleýmettik bastamasyn iske asyrýdyń naqty tetigin ázirledi.
