Shaǵyn nesıege bólinetin 20 mlrd teńge qandaı sharttarmen beriledi
Vıtse-mınıstrdiń aıtýynsha, «Nátıjeli jumyspen qamtý jáne jappaı kásipkerlikti damytý» baǵdarlamasyna 2018 jyly 41,8 mlrd teńge qarastyrylǵan. Endi Elbasynyń tapsyrmasyna sáıkes qosymsha 20 mlrd teńge qosylady. Sonymen 62 mlrd teńgege jýyq qarajat bıyl shaǵyn nesıe berýge jumsalady.
«Qosymsha bólinetin 20 mlrd teńgeniń 14 mlrd teńgesi aýyldyq jerlerge, 6 mlrd teńgesi qalalarǵa beriledi. Jalpy baǵdarlama aıasynda berilgen nesıeler aýyldyq jerlerde shaǵyn jáne orta bıznes sýbektileriniń 3,6 paıyzǵa artýyna septigin tıgizdi», - dedi Nurjan Áltaev.
Onyń aıtýynsha, aýyldyq jerlerde shaǵyn nesıe uıymdary qaryzdy 30, tipti 50 paıyzǵa deıingi ústememen beredi. Al bul kásipkerlikti bastaý úshin óte aýyr ústeme sanalady.
«Al baǵdarlama aıasynda joǵaryda atalǵan qarjy 6 paıyzben qalada 5 jylǵa deıin, aýyldyq jerlerde aýyl sharýashylyǵy men mal sharýashylyǵymen aınalysatyn bolsa 7 jylǵa deıin beriledi. Aýyl halqy úshin 6 paıyz óte tıimdi. Sondyqtan suranystyń óte kóp ekendigin kórip otyrmyz», - dedi ol.
Nurjan Áltaevtyń aıtýynsha, ótken jyly «Bastaý bıznes» baǵdarlamasy arqyly 15 myń adam kásipkerliktiń qyr-syryn úırense, aǵymdaǵy jyly kásipti qalaı bastaý kerektigin «Atameken» Ulttyq kásipkerler palatasy arqyly 30 myń adam ıgeretin bolady.
«Aýyl azamattary osy qarajattardy alyp, óz bıznesin bastaǵylary kelse eń aldymen «Atameken» UKP fılıaldaryna júginip, ótinimderin berýi qajet. Bul nesıeler aýyldyq jerlerde «Aýyl sharýashylyǵyn qarjylaı qoldaý qory» arqyly, al qalalarda ekinshi deńgeıli bankter arqyly beriledi. Biraq, qalada jumyssyz júrgen, ózin-ózi jumyspen qamtyǵan azamattar eń aldymen Ulttyq kásipkerler palatasynyń fılıaly nemese Kásipkerlerge qyzmet kórsetý ortalyqtary ne bolmasa Jumyspen qamtý ortalyqtarynda júginse bolady», - dedi vıtse-mınıstr.
