Shaǵyn kemeni paıdalaný talaptaryn saqtamaýǵa qatysty derekter anyqtaldy
ASTANA. QazAqparat - Jazǵy maýsym kezinde sý kóligine júrgizilgen tekserýler barysynda qaýipsizdik talaptaryna saı kelmeıtin birqatar zań buzýshylyqtar anyqtaldy, dep habarlaıdy QR IDM baspasóz qyzmeti .
Mınıstrlikke qarasty Kólik komıtetiniń aqparaty boıynsha, 1 maýsym men 31 tamyz aralyǵynda elimizde jyl saıynǵy «Skýter» respýblıkalyq aktsııasy ótti. Sharanyń maqsaty - shaǵyn kólemdi sý kóligin qaýipsiz paıdalanýdy, elimizdiń sý qoımalaryndaǵy kópshilik demalatyn aımaqtar men oryndarda adamdardyń ómiri men densaýlyǵyn saqtaýdy qamtamasyz etý.
Tekserý barysynda shamamen 5,6 myń shaǵyn kólemdi keme tekserildi (gıdrotsıkldar, katerler, motorly kemeler t.b.), sondaı-aq 744 ákimshilik zań buzýshylyq anyqtaldy. Bul rette, ákimshilik quqyq buzýshylyqtardyń basym kópshiligi Shyǵys Qazaqstan, Almaty, Qyzylorda, Atyraý jáne Qostanaı oblystarynda tirkelgen.
Anyqtalǵan zań buzýshylyqtardyń negizgi túrleri: 471 kemeni jeke qutqarý jabdyqtarynsyz paıdalaný, 117 kemeni qujatsyz paıdalaný, 86 basqarý quqyǵyn beretin qujatsyz kemeni paıdalaný, 35 tirkelmegen nemese tehnıkalyq tekserýden ótpegen jáne bort nómirleri joq kemeleni basqarý oqıǵasy tirkeldi.
Sonymen qatar, komıtettiń aýmaqtyq organdary shaǵyn kólemdi flottyń qaýipsiz paıdalanýyn retteıtin zańnamanyń talaptaryn túsindirý boıynsha shaǵyn kólemdi keme ıelerimen, baza-turaqtardyń jáne demalys aımaqtarynyń ıelerimen profılaktıkalyq jumystar ótkizdi.
