Shaǵyn fýtboldan Qazaqstannyń ashyq chempıonatynyń 3-shi týr oıyndary ótedi
ALMATY. Qańtardyń 6-sy. QazAqparat /Erlik Erjanuly/ - Búgin Qaraǵandydaǵy "Tulpar" sport kesheninde shaǵyn fýtboldan Qazaqstannyń ashyq chempıonatynyń 3-shi týr oıyndary bastalady,
dep habarlaıdy QazAqparat.
Buǵan deıingi 2 týrdyń qorytyndysy boıynsha týrnır kestesiniń kósh basynda Almatynyń "Qaıraty" men Qaraǵandynyń "Tulpar" komandalary tur. Almatylyqtar qarsylastar qaqpasyn 38 ret dál kózdep, ózderine 19 ret dop jiberip aldy. Olarmen upaı sanymen (19) úzeńgi qaǵystyryp kele jatqan qaraǵandylyqtar bolsa 21 dop soǵyp, 12 dop jiberip aldy. Al qyrǵyz elinen kelgen "Azııa ýnıversal bank"(AÝB) pen "Ádilet" komandalary 7 jáne 3 upaımen týrnır kestesin túıindep tur. Úshinshi týrdyń alǵashqy oıyndary búgin Bishkek qalasynyń "AÝB" pen Astananyń "Ushqyn-Iskra" jáne "Qaırat" pen "Tulpar" arasynda ótedi. Al aqyrǵy oıyndary qańtardyń 10-y kúni "Qaırat" pen "Ádilet", "Tulpar" men "AÝB" arasyndaǵy kezdesýmen aıaqtalady.
Qazirgi tańda mergender kóshin 14 doppen almatylyq klýbtyń aıaq dopshysy Katata bastap kele jatyr. Odan keıingi oryndy qorjynynda 7 doby bar Maksım Batov (Ushqyn-Iskra), Pavel Taký (Tulpar) men Eten (Ádilet) ózara bólisti.
