Shaǵyn fýtboldan «ELORDA-2018» týrnıriniń jeńimpazy anyqtaldy
Elorda ákimdiginiń qoldaýymen ótken týrnır Astananyń 20 jyldyǵyna jáne «Shell» kompanııasynyń Qazaqstandaǵy 25 jyldyǵyna arnaldy. Іs-sharanyń uıymdastyrýshylary - «Shell Qazaqstan» kompanııasy jáne «Elorda Aqparat» medıakompanııasy.
Jarystyń ashylý saltanatyna Astana ákiminiń orynbasary Ermek Amanshaev jáne QR Energetıka vıtse-mınıstri Maǵzum Myrzaǵalıev qatysyp, fýtbol merekesin uıymdastyrýshylarǵa alǵysyn aıtyp, barlyq qatysýshy komandalarǵa sáttilik tiledi.
«Búgin biz Otanymyzdyń júregine, Táýelsizdigimizdiń tiregine aınalǵan Astanamyzdyń 20 jyldyq mereıtoıyna arnalǵan jáne «Shell» kompanııasynyń Qazaqstanda jumys júrgize bastaǵanyna 25 jyl tolýyna oraı ótip jatqan sharaǵa qatysyp otyrmyz. Áýesqoı sportshylar arasyndaǵy osy týrnır aldymen salaýatty ómir saltyn nasıhattasa, ekinshiden, munaı-gaz salasy men jýrnalıster qaýymy arasynda yntymaqqa dáneker bolady dep oılaımyz. Jáne bul jarys Astanamyzda dástúrli túrde ótip turatyn týrnırge aınalady dep senemiz»,- dedi Ermek Amanshaev.
Jarysqa 16 komanda qatysty. Atap aıtsaq: Astana qalasy ákimdigi, QR Energetıka mınıstrligi, «Shell Qazaqstan», «Qazmunaıgaz UQ» AQ, «ENI», «Total», «NKOK N.V.», «KPO B.V.», «PSA» JShS, «Qazaqstan», «Habar», «Egemen Qazaqstan», «Astana TV», «Qazaq radiosy», «QazAqparat» jáne «Elorda Aqparat» komandalary.
Dop dodasynyń fınalynda «Habar» jáne «Qazmunaıgaz» komandalary kezdesip, negizgi ýaqytta esep ashylmaı, oıyn taǵdyry penaltı serııasynda sheshildi. Nátıjesinde 2:1 esebimen «Qazmunaıgaz» jeńip, týrnırdiń jeńimpazy atandy.
Al úshinshi oryn úshin bolǵan oıynda QR Energetıka mınıstrliginiń komandasy «NKOK N.V.» komandasynan 2:1 esebimen basym tústi.
Sonymen qatar, «Úzdik shabýylshy» atalymymen Astana ákimdigi komandasynyń oıynshysy Aleksandr Sementsov marapattalsa, «habarlyq» Aıbek Qabylsha «Úzdik qaqpashy» atandy. Al «Qazmunaıgaz» komandasynyń namysyn qorǵaǵan Tamerlan Asanov týrnırdiń «Úzdik oıynshysy» retinde tanyldy.
Munaı-gaz salasy komandalarynan jınalǵan jarna - 2 mln teńge «Speshıal Olımpıks Qazaqstan» uıymyna aýdaryldy. Bul qarajat 2019 jyly naýryzda BAÁ-de ótetin Dúnıejúzilik Jazǵy Olımpıada oıyndaryna múmkindigi shekteýli jasóspirimderden quralǵan shaǵyn fýtboldan Qazaqstan jastar quramasynyń daıyndyǵyna jumsalady.
Buǵan qosa, chempıon bolǵan «Qazmunaıgaz» komandasy da jeńip alǵan bas júldesi - 150 myń teńgeni qaıyrymdylyqqa aýdardy.
