Shaǵyn bıznesti kúıreýden qorǵaý qadamdaryn eskerý kerek - depýtat
NUR-SULTAN. QazAqparat – Parlament Májilisiniń jalpy otyrysynda depýtat Keńes Absatırov koronavırýstyń bolýy múmkin jańa tolqyny qaýpine baılanysty bıznesti qorǵaý qadamdaryna nazar aýdardy. Osy oraıda ol Úkimet basshysy Asqar Mamınniń atyna depýtattyq saýal joldady, dep habarlaıdy QazAqparat tilshisi.
«Sońǵy aptalarda álemde COVID—19 indetin juqtyrýdyń jańa tolqyny baıqalýda. Eýropada aýrýǵa shaldyqqandar 5 mıllıonnan asyp ketti, onyń ishinde 230 myńy qaıtys boldy. Azııa elderinde 8 mıllıonnan astamy aýrý juqtyryp, 130 myńy kóz jumdy», - dep toqtaldy depýtat.
Osy oraıda ol kórshiles Reseıde de jaǵdaı ýshyǵyp bara jatqanyn jetkizdi.
«Syrtqy úrdister turǵysynda qoǵam elimizde aýrý juqtyrýdyń bolýy múmkin qaýpiniń jańa tolqynyna qatysty alańdap otyr. Sonymen qatar, kásipkerler bıznestiń jabylýyna qaýiptenip otyr. Sebebi shaǵyn jáne orta bıznes sýbektileriniń kóbisi jumystaryn qalpyna keltire almady», - dedi Keńes Absatırov.
Osyǵan baılanysty «Aq jol» partııasynyń fraktsııasy Úkimetten qabyldanyp jatqan sharalar aıasynda azamattardyń ómir súrý deńgeıiniń tómendeýine jol bermeýdi, shaǵyn jáne orta bıznesti kúıreýden qorǵaý qadamdaryn eskerýdi surady.
