Shaǵyn bıznes úshin taǵy bir Halyqqa qyzmet kórsetý ortalyǵy ashyldy

PAVLODAR. QazAqparat - Shaǵyn jáne orta bıznes ókilderi úshin halyqqa qyzmet kórsetý ortalyǵy Pavlodar qalasynda jumys isteı bastady, dep habarlaıdy QazAqparat «Azamattarǵa arnalǵan úkimet» memkorporatsııasyna silteme jasap.

Bul týraly sheshimdi Pavlodar oblysynyń tótenshe jaǵdaı tártibin qamtamasyz etý jónindegi shtaby qabyldady. Taıaý ýaqytta tótenshe jaǵdaı tártibin qamtamasyz etý jónindegi oblystyq shtabtardyń sheshimimen zańdy tulǵalarǵa qyzmet kórsetý úshin Qazaqstannyń ózge qalalarynda da HQO ashylatynyn atap ótken jón.

Kásip ıelerin qabyldaý oblys ákimdiginiń aldyn-ala usynylǵan tizimine sáıkes júrgiziledi. Ol tizimge nesıelendirý boıynsha oń sheshim alǵan kásipkerler kiredi.

Aıta keteıik, dál osyndaı HQO ótken aptada Almaty qalasynda ashylǵan bolatyn. Osy ýaqyt aralyǵynda onda kásipkerler 500-den astam qyzmet alǵan.

Azamattarǵa arnalǵan úkimet memlekettik qyzmetterdiń ýaqytyly ári sapaly kórsetilýi úshin bıznes ókilderinen qujattardyń tolyq paketin birden usynýdy jáne betperde kııý tártibin saqtaýdy suraıdy. Sanıtarlyq-epıdemıologııalyq rejımdi saqtaý maqsatynda memlekettik korporatsııa qyzmetkerleri de maskalar men qolǵaptarmen qamtamasyz etiledi.