Shaǵyn bıznes úshin eńbekaqy tóleý qorynan alynatyn biryńǵaı tólem engiziledi – Álibek Qýantyrov

ASTANA. QazAqparat – Shaǵyn bıznes úshin eńbekaqy tóleý qorynan alynatyn biryńǵaı tólem engiziledi. Bul týraly Májilistiń jalpy otyrysynda salyq máselesine arnalǵan zań jobasyn talqylaý kezinde QR Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

Atap aıtqanda, búgin palata depýtattary «Salyq jáne bıýdjetke tólenetin basqa da mindetti tólemder týraly» Kodeksine jáne «Salyq jáne bıýdjetke tólenetin basqa da mindetti tólemder týraly» Kodeksin qoldanysqa engizý týraly» Zańyna ózgerister men tolyqtyrýlar engizý týraly» zań jobasyn birinshi oqylymda qarap jatyr. Qujat Úkimettiń zań jobalaý jumystarynyń josparyna sáıkes jáne Memleket basshysynyń tapsyrmalaryn iske asyrý úshin ázirlendi.

«Birinshi blok – eńbekaqy qoryna júktemeni azaıtý. Memleket basshysy byltyrǵy Qazaqstan halqyna Joldaýynda jıyntyq júktemeni azaıta otyryp, mıkrobıznes jáne shaǵyn bıznes úshin eńbekaqy tóleý qorynan alynatyn biryńǵaı tólemdi engizýdi tapsyrǵan bolatyn. Qazirgi ýaqytta eńbekaqy qorynan mólsherlemeleri, esepteý bazalary ártúrli birneshe tólemder júrgiziledi. Bul tólemderdi bir tólemge biriktirý usynyldy. Áleýmettik aýdarymdar mólsheri qyzmetkerlerge tólenetin bolashaq tólemderge áser etetindikten, júktemeni jeke tabys salyǵy esebinen tómendetý kózdelip otyr», - dedi Á. Qýantyrov.

Onyń aıtýynsha, biryńǵaı mólsherleme mindetti zeınetaqy jarnalaryn engizýdi jáne áleýmettik aýdarymdar mólsherlemesiniń ósýin eskeretin bolady.

«Tólemdi arnaýly salyq rejımderindegi mıkrobıznes jáne shaǵyn bıznes sýbektileri erikti negizde qoldanatyn bolady. Soma biryńǵaı jıyntyq tólem tetigine uqsas bólinedi. Osy oraıda biryńǵaı tólem salyqtar men eńbekaqy tólemderin esepteýdi jeńildetip qana qoımaı, salyq júktemesin azaıtýǵa da múmkindik beredi», - dedi mınıstr.