Shaǵyn bıznes qadaǵalaý organdary tarapynan eleýli qıyndyqtarǵa tap boldy - senator
Depýtat bıznes ókilderi tekserý taǵaıyndalǵan jáne júrgizilgen kezde, onyń ishinde moratorıı men karantın kezeńinde anyqtalǵan zań buzýshylyqqa shaǵym aıtqanyn jetkizdi.
«Shaǵyn bıznes baqylaý jáne qadaǵalaý organdary tarapynan eleýli qıyndyqtarǵa tap bolyp otyr. 2020 jyly árbir 3-shi tekserý shaǵyn kásipkerlik sýbektisiniń qyzmetine jasaldy. Bul rette árbir 5-shi tekserý kásipkerlerdiń quqyqtaryn buza otyryp júrgizildi. Osylaısha, tıisti organdar kásipkerlerdiń qyzmetine tekserý júrgizý kezinde olardyń quqyqtaryn buzýdyń 12 myńnan astam deregin anyqtady», - dedi Lýkın Úkimet basshysy Álıhan Smaıylovtyń atyna joldaǵan saýalynda.
Depýtattyń aıtýynsha, zańsyz qozǵalǵan 8 745 ákimshilik is júrgizý, shekteý sharalaryn zańsyz qoldanýdyń 2 665 faktisi, ýákiletti emes tulǵalardyń 93 ret tekserý taǵaıyndaǵany, esh negizsiz 38 tekserý, ózge de 86 zań buzýshylyq bolǵany anyqtaldy.
Senator Andreı Lýkın osyǵan baılanysty elimizdiń Premer-Mınıstrinen oryn alǵan zań buzýshylyqtardy joıýǵa kómektesýdi surady.
«Ýákiletti organdardyń tekserý men baqylaýdyń ózge de túrleri boıynsha qyzmetin memlekettik baqylaýdyń ýaqtylylyǵyn qamtamasyz etý, baqylaý jáne qadaǵalaý organdarynyń qyzmetindegi baqylaý is-sharalaryn sapaly jáne tıimdi josparlaýdy, onyń ishinde táýekelderdi baǵalaýdyń vedomstvolyq júıesin jetildirý arqyly uıymdastyrýdy, sondaı-aq kásipkerlik qyzmetke zańsyz aralasý faktileri boıynsha qoldanystaǵy zańnamaǵa laýazymdy adamdardyń jaýapkershiligin qatańdatýǵa baǵyttalǵan ózgerister men tolyqtyrýlar engizý jóninde bastama jasaý múmkindigin qarastyrýdy suraımyn», - dedi senator óz saýalynda.
Depýtat sonymen qatar qaramaǵyndaǵy qyzmetkerlerdiń is-áreketine tıisti baqylaýdy qamtamasyz etpegen baqylaý jáne qadaǵalaý organdarynyń kináli laýazymdy tulǵalarymen qatar ortalyq memlekettik jáne jergilikti atqarýshy organdar basshylarynyń da tártiptik jaýaptylyǵy týraly máseleni qaraýdy surady.
