Shaǵymnan keıin Semeı polıtsııa basqarmasynyń basshysy qyzmetinen ketetin boldy
NUR-SULTAN. QazAqparat – Semeı qalalyq polıtsııa basqarmasynyń basshysy Maqsat Zekenov qyzmetinen ketedi. Bul týraly Ortalyq kommýnıkatsııalar qyzmetinde ótken brıfıngte Shyǵys Qazaqstan oblysynyń ákimi Danıal Ahmetov málim etti, dep habarlaıdy QazAqparat tilshisi.
Baspasóz máslıhatynda áleýmettik jelide Semeı qalalyq polıtsııa basqarmasynyń basshysyna qatysty shaǵym bolǵany, onda atalǵan Maqsat Zekenov jeke quramnan aqsha bopsalaýmen aınalysyp júrgeni jazylǵany aıtyldy.
Osy oraıda atalǵan shaǵymǵa qatysty tıisti tekserý júrgizý múmkindigi suraldy.
Óz kezeginde oblys ákimi Danıal Ahmetov Semeı qalalyq polıtsııa basqarmasynyń basshysy jaqyn arady qyzmetinen bosatylatynyn jetkizdi.
«Áleýmettik jelidegi barlyq faktilerdi qarap, oǵan tyńǵylyqty taldaý jasaımyz. Jaqyn arada Semeı polıtsııa basqarmasynyń basshysy óz qyzmetinen ketedi. Osy oraıda barlyq máselelerdi tekserip, qarap jatyrmyz», - dedi ShQO ákimi.
