Shaǵymdardyń kóbi polıtsııanyń jumysyna qatysty túsedi – agenttik
«Agenttiktiń Call-ortalyǵyna bıyl 21 myńǵa jýyq qońyraý kelip tústi. Onyń 3 600-dan astamy sybaılas jemqorlyqqa qarsy qyzmettiń quzyretine jatady. Aqparattyq esepke alý kitaby sheńberinde tekserýge sybaılas jemqorlyq faktileri týraly 600 ótinish alyndy. Bul rette, qylmystyq quqyq buzýshylyq belgilerimen 66 nemese 11%-y boıynsha sotqa deıingi tergeý júrgizildi. Tergeý nátıjeleri boıynsha 18 is sotqa jiberildi», - deıdi Sybaılas jemqorlyqqa qarsy qyzmettiń Strategııa jáne jedel basqarý departamentiniń basshysy Nurlan Jaqsymbetov.
Onyń aıtýynsha, ótinishterdiń kópshiliginde qylmystyq jáne ákimshilik jaýapkershilikke tartylmaǵany, kedergisiz júrip ótkeni, anyqtamalar, júrgizýshi kýálikteri, dıplomdar bergeni, múgedektikti, járdemaqylardy rásimdegeni, jumysqa ornalastyrǵany jáne t.b. úshin parany bopsalaý faktileri anyqtalǵan.
«Basshylardyń qaramaǵyndaǵylardan aqsha qarajatyn jınaý, laýazymdyq ókilettikterin teris paıdalaný, qyzmet boıynsha áreketsizdik, memlekettik satyp alý protsesinde urlaý, memlekettik baǵdarlamalardy oryndaý, sondaı-aq shaǵyn bızneske zańsyz qamqorlyq jáne kedergi jasaý faktileri da az emes. Shaǵymdardyń kóbi polıtsııa qyzmetkerleriniń (236), jergilikti atqarýshy organdar qyzmetshileriniń (116), memlekettik kirister organdary qyzmetkerleriniń (45) áreketterine túsedi. Respýblıka boıynsha Call-ortalyqtyń ótinishteri negizinde barlyǵy 29 polıtsııa qyzmetkeri tartyldy. Jergilikti atqarýshy organdardyń quramynda – bilim berý jáne densaýlyq saqtaý salalary. Ótinish berýshilerdiń eń kóp sany Túrkistan oblysy (96), Almaty qalasy (85), Almaty oblysy (80), Shymkent qalasy (45), Qaraǵandy oblysy (43), Nur-Sultan qalasy jáne Jambyl oblysyna (41-den) keledi», - deıdi ol.
