Shaǵymdardan keıin elordalyq mektep dırektorymen eńbek sharty uzartylmaıtyn boldy
ASTANA. QazAqparat - Astanadaǵy № 67 mektep dırektorymen eńbek sharty uzartylmaıdy. Bul týraly búgin Astana qalasy Bilim basqarmasy basshysynyń mindetin atqarýshy Ánýar Janǵozın málim etti, dep habarlaıdy QazAqparat.
«№ 67 mektep dırektoryna qatysty muǵalimder tarapynan kelip túsken shaǵymdar faktisi boıynsha ishki tekserýdi júrgizdik. Onyń qorytyndysynda mekteptiń ákimshiligi men dırektory jumysyna eskertýler anyqtaldy. Mamyr aıynda dırektorǵa sógis jarııaladyq. Atap aıtqanda, shaǵymdarda kórsetilgen keıbir faktiler bizdiń quzyrettilikke jatpaǵandyqtan, biz ótinimderdi Memlekettik qyzmet isteri jáne sybaılas jemqorlyqqa qarsy is-qımyl agenttigine, Іshki ister departamentine, Bilim salasyndaǵy baqylaý departamentine baǵyttadyq. Olar óz tarapynan da birqatar tekserýler jasady. Tekserý nátıjesi boıynsha sybaılas jemqorlyq turǵysyndaǵy faktileri rastalmady»,-dedi Janǵozın Ortalyq kommýnıkatsııalar qyzmetindegi baspasóz máslıhatynda.
Osy oraıda ol shaǵymdarda atap kórsetilgen máselelerdiń negizdi bolmaı shyqqanyn jetkizdi.
«Mektepte týyndaǵan barlyq problemalardy, sondaı-aq jasalǵan sógisti eskere otyryp, mektep dırektorymen eńbek shartyn uzartpaý týraly sheshim qabyldadyq. Sebebi eńbek sharty 2016 jyldyń tamyzynda jasalǵan jáne ol bir jylǵa eseptelgen. Bıyl tamyzda sharttyń merzimi aıaqtalǵandyqtan, biz ony uzartpaıtyn bolamyz»,-dedi ol.
Budan buryn habarlanǵandaı, bıyl mamyrda Astana qalasy bilim basqarmasy elordadaǵy № 67 mektep ustazdary atynan kelip túsken shaǵym boıynsha arnaıy komıssııa quryp, mektep ujymy men oqýshylardyń ata-analarymen kezdesý ótkizdi. Buǵan deıin qoǵam belsendisi Aqmaral Omaralınova elordalyq № 67 mektep-gımazııasy dırektorynyń zańdy belden basý áreketine qarsylyq bildirgen ustazdardyń pikiri týraly áleýmettik jelide jazba qaldyrǵan bolatyn.
