Shaǵyn jáne orta bıznestiń teń jartysyn áıelder basqaryp otyr
ASTANA. KAZINFORM – Uttyq statbıýronyń qańtardaǵy dereginshe, shaǵyn jáne orta bıznes sýbektileriniń 49%-yn áıelder basqaryp otyr. Naqty aıtqanda 1 008 328 sýbekti. Qoǵamdyq saıasat ınstıtýty mereke qarsańynda kásipti násip etken áıelder týraly málimet bólisti.
Sońǵy 10 jyl ishinde áıel kásipkerler kóbeıip, olardyń úlesi 10,5%-ǵa ósti.
Elimiz aqyryndap kásipkerlikte genderlik tepe-teńdikke bet buryp jatyr dep aıtýǵa bolady.
Kásipker áıelderdiń eń kóp sany shaǵyn bızneste shoǵyrlanǵan (1 005 963 sýbekt), onyń ishinde 878 myń áıel jeke kásipkerlik sýbektisiniń basshysy. Bul resmı tirkelgen jeke kásipkerlerdiń jalpy sanynyń 53,6% quraıdy. Orta bıznesti basqaratyn áıelderdiń úlesi 36%.
Óńirlik bóliniske kelsek, áıelder bıznesi basym, ol aldymen Jambyl oblysynda (34,3%), odan soń Qyzylorda oblysy (33,6%), úshtikti Almaty qalasy (32,3%) jabady.
Kásipker áıelder arasynda eń kóp taralǵan bıznes túri — bilim (71%) jáne densaýlyq (58%) salasy.
Jalpy, áıelder kásipkerligi shaǵyn jáne orta bıznes sektoryndaǵy jumys oryndarynyń 31% jáne jalpy ishki ónimniń 14,6% qamtyp otyr.
Kásipker áıelder memlekettik qoldaý sharalaryn tıimdi paıdalana otyryp, ekonomıkanyń barlyq sektorynda tabysty eńbek etýde.
Máselen, ótken jyly 2 359 áıel kásipkerlerge arnalǵan kredıtter boıynsha paıyzdyq mólsherlemeni sýbsıdııalaý quraldaryn tıimdi paıdalanǵan, bul jalpy kólemniń 55%.
Mańǵystaý, Jambyl oblystarynda jáne Astana jáne Shymkent qalalarynda kásipker áıelderdiń jobalary belsendi túrde sýbsıdııalanady.
Sýbsıdııa beriletin salalar arasynda óńdeý ónerkásibi, kólik jáne qoıma jobalary basym.
Osylaısha kásippen aınalysyp, ony basqaratyn názik jandar áıelderdiń kóbisi saýdamen aınalysady degen stereotıpti buzady. Statıstıka sońǵy bes jylda óńdeý ónerkásibindegi áıelderdiń úlesi 26%-ǵa, al saýdada 1%-ǵa ǵana óskenin kórsetedi.
Áıelder kásipkerligi Qazaqstannyń óńdeý ónerkásibiniń ósý quralyna aınalýda. Saýda ókilderi aınalym kapıtalyn jınap, buryn satqan taýarlardy endi ózderi shyǵara bastady.
