Shaǵyn jáne orta bızneske ákimshilik júktemeni azaıtýdy jalǵastyrý kerek – Senat tóraǵasy

Shaǵyn jáne orta bıznes ekonomıkany damytýdyń mańyzdy draıverleriniń biri bolýy tıis. Bul týraly Senatta tóraǵasy Máýlen Áshimbaev aıtty, dep habarlaıdy Kazinform. 

«Memleket basshysy bıylǵy Joldaýynda ekonomıkalyq damýdyń jańa úlgisine kóshýdiń negizgi basymdyqtaryn belgilep berdi. 2029 jylǵa qaraı ulttyq ekonomıkanyń kólemin 2 esege ulǵaıtyp, 450 mlrd AQSh dollaryna jetkizý eskerilgen. Bul – aýqymdy ári kúrdeli mindet. Osy rette, shaǵyn jáne orta bıznes ekonomıkany damytýdyń mańyzdy draıverleriniń biri bolýy tıis. Jalpy, shaǵyn jáne orta kásipkerlikti damytý jáne qoldaý memlekettiń negizgi basymdyqtarynyń biri», - dedi M.Áshimbaev Senatta «Qazaqstan Respýblıkasynda shaǵyn jáne orta kásipkerlikti damytý» taqyrybynda ótip jatqan Úkimet saǵatynda.

Bul turǵyda Senat tóraǵasy Parlament Úkimetpen birlesip, tıisti normatıvtik-quqyqtyq bazany jetildirý jolynda únemi belsendi jumys istep jatqanyn aıtty.

«Qazir depýtattardyń qaraýyndaǵy qujattardyń qatarynda bıznesti júrgizý máseleleri jónindegi zań jobasy da bar. Búgingi is-sharamyz atalǵan zań jobasynyń sapasyn arttyrýǵa da oń áserin tıgizedi dep senemiz. Elimizde bıznesti damytý baǵytynda arnaıy ulttyq joba qabyldanǵany belgili. Sondaı-aq shaǵyn jáne orta kásipkerlikti damytýdyń 2030 jylǵa deıingi tujyrymdamasy iske asyrylyp jatyr. Kásipkerlerge jan-jaqty jáne keshendi qoldaý kórsetilip otyr. Shaǵyn jáne orta bıznesti tekserýge úsh jyldyq moratorıı jarııalanǵany da belgili. Ol osy jyldyń sońyna deıin qoldanysta bolady. Ákimshilik júktemeni azaıtý baǵytynda da biraz is-sharalar júzege asyryldy. Osyndaı jumystardy aldaǵy ýaqytta jańa qarqynmen júrgizýimiz qajet. Búgingi Úkimet saǵaty bul baǵyttaǵy mańyzdy bastamalardy jan-jaqty talqylyp, tujyrymdaýǵa múmkindik beredi dep senemiz», - dedi Máýlen Áshimbaev.