Shaǵyn jáne orta bıznes sýbektileriniń sany 1,5 ese ósti
ASTANA. KAZINFORM — Qazaqstanda sońǵy jeti jylda shaǵyn jáne orta bıznes sýbektileriniń sany 1,5 ese artty. Memleket basshysy Qasym-Jomart Toqaev Joldaýynda salanyń ekonomıkadaǵy rólin atap ótip, bıznesti ártaraptandyrý, óndiristi damytý jáne kásipkerlerge qolaıly jaǵdaı jasaý mindetterin aıqyndady.
Prezıdenttiń aıtýynsha, shaǵyn jáne orta bıznestiń jalpy ishki ónimdegi úlesi 40 paıyzǵa jetken, al negizgi kapıtalǵa salynǵan ınvestıtsııadaǵy úlesi 70 paıyzǵa jaqyndaǵan. Sonymen qatar kásipkerlerdiń úshten birinen astamy saýda salasynda jumys isteıdi. Osyǵan baılanysty orta bıznesti damytýdyń arnaıy josparyn ázirleý, kásiporyndardy uzaq merzimdi qarjylandyrý jáne óndiristi tehnologııalyq jańǵyrtý kózdelip otyr. Memleket basshysy shaǵyn jáne orta bıznestiń memlekettik jáne kvazımemlekettik satyp alýǵa qatysý múmkindigin keńeıtip, ónim berýshilerge qoıylatyn talaptardy jeńildetý qajettigin de atap ótti.
Kásipkerlerdiń qarjyǵa qoljetimdiligin arttyrý maqsatynda «Damý» kásipkerlikti damytý qory jeńildetilgen kredıt, sýbsıdııa jáne kepildik berý tetikterin usynady. 2019-2026 jyldary bul quraldar 228,6 myń jobany qamtydy. Kredıtterdiń jalpy somasy 13,2 trln teńgege jýyqtady. Osy kezeńde qoldaý alǵan kásipkerler 899,2 myń jumys ornyn saqtap, 93,1 myń jańa jumys ornyn ashty. Sondaı-aq 134,8 trln teńgeniń ónimin óndirip, bıýdjetke 9,4 trln teńge salyq tóledi.
Kepil múlki jetkiliksiz kásipkerlerdiń kredıt alý múmkindigin keńeıtý úshin 2025 jyly «Damý» qorynyń bazasynda kepildik berý qory quryldy. QR Ulttyq ekonomıka mınıstrligi Kásipkerlikti memlekettik qoldaý jáne qorǵaý departamenti dırektorynyń orynbasary Salamat Ońalbekovtyń aıtýynsha, bıyl da kásipkerlerdi qarjylaı qoldaý jalǵasyp jatyr.
— Kásipkerlerdiń kepildik máselesin sheshý úshin «Damý» qorynyń bazasynda 2025 jyly Kepildik qory quryldy. Bıyl 407 mlrd teńgege 2 250 joba qoldaý tapty. Osy jyly «Іsker aımaq» baǵdarlamasy iske qosylyp, onyń aıasynda 42,5 mlrd teńgege 647 jobaǵa qoldaý kórsetildi, — dedi Salamat Ońalbekov.
«Іsker aımaq» baǵdarlamasy mıkro jáne shaǵyn bızneske, aýyl sharýashylyǵy kooperatıvteri men áleýmettik kásipkerlerge arnalǵan. Kásipkerler úsh jylǵa deıingi merzimge 200 mln teńgege deıin nesıe ala alady. Memleket nesıe syıaqysynyń 40 paıyzyn sýbsıdııalaıdy. Al «Órleý» baǵdarlamasy aıasynda 7 mlrd teńgege deıin kredıt berilip, jyldyq syıaqy mólsherlemesi 12,6 paıyzdan aspaıdy. Investıtsııalyq kredıttiń merzimi 10 jylǵa deıin belgilengen.
Kásipkerlerge memlekettik qyzmetterdi alý jáne ákimshilik máselelerdi sheshý boıynsha da kómek kórsetiledi. Qazir bes óńirde bıznesti qoldaý jáne súıemeldeý ortalyqtary jumys isteıdi. Olar «bir tereze» qaǵıdaty boıynsha qyzmet kórsetedi.
Sondaı-aq bıznestiń erkin damýyna kedergi keltiretin ákimshilik júktemeni azaıtý máselesi kún tártibinde tur. Prezıdent Joldaýynda mıkro jáne shaǵyn bıznesti tekserýge 2027 jylǵy 1 qańtardan bastap úsh jyldyq moratorıı engizýdiń oryndylyǵyn talqylaýdy usyndy. Sondaı-aq otandyq óndirýshilerge negizsiz kedergi keltirýdi toqtatyp, ádil básekeni qamtamasyz etý qajettigin atap ótti.
Endigi mindet — qarjylyq qoldaýmen qatar, kásipkerlerge turaqty ári boljamdy jumys jaǵdaıyn qalyptastyrý, óndiristi keńeıtý jáne qazaqstandyq ónimniń básekege qabiletin arttyrý.
Buǵan deıin otandyq kásipkerlerdiń EAEO-ǵa múshe memleketterdiń memlekettik satyp alý naryǵyna shyǵý múmkindigin keńeıtetin ózgerister týraly jazǵan edik.
