Shaǵyn jáne orta bıznes shyǵaratyn ónim kólemi 25% ósken

ASTANA. KAZINFORM — 2025 jyldyń birinshi jartyjyldyǵynda shaǵyn jáne orta bıznes sýbektileri shyǵaratyn ónim kólemi 25% ósti. Bul týraly QR Ulttyq ekonomıka vıtse-mınıstri Erlan Saǵynaev aıtty.

Spıkerdiń aıtýynsha, sońǵy jyldary shaǵyn jáne orta bıznes damýynyń oń serpini baıqalady. 2025 jyldyń alǵashqy jartyjyldyǵynda ShOB-tyń jalpy ishki ónimdegi úlesi 39,8% boldy.

— Ekinshi jartyjyldyqta kásipkerlik sektorynda jumyspen qamtylǵandardyń jalpy sany 3,8%-ǵa artyp, 4,4 mln adamǵa jetti. Bul aralyqta tirkelgen ShOB sýbektileriniń 91,2%-y óz qyzmetin jalǵastyryp jatyr, – dedi E.Saǵynaev Ortalyq komýnıkatsııadar qyzmetinde.

Ulttyq ekonomıka mınıstrliginiń málimetinshe, 2025 jyldyń birinshi jartyjyldyǵynda ShOB sýbektileri shyǵaratyn ónim kólemi 25%-ǵa ósip, 42,7 trln teńgege jetti. Ónim shyǵarylymynyń ulǵaıýy saýda, ónerkásip, onyń ishinde óńdeý ónerkásibi, qurylys, kólik jáne qoımalaý, aýyl, orman jáne balyq sharýashylyǵy salarynda baıqalady.

Sonymen birge, Ulttyq ekonomıka mınıstrligi men EQQDB orta bıznesti aýqymdy keńeıtý jónindegi jospardy ázirlep jatyr. Onda kásiporyndarǵa dıagnostıka júrgizý jáne olardyń jeke damý josparlaryn ázirleý boıynsha qoldaý kórsetiledi.

– Orta bıznes negizinen óńdeý ónerkásibinde shoǵyrlanǵan, metallýrgııa, jeńil ónerkásip, qurylys materıaldary men mashına jasaý salalaryna 12% tıesili. Atalǵan salalarda keńeıý múmkindigi bar, sebebi qoldanystaǵy óndiristik qýattar, onyń ishinde orta bıznes kásiporyndary tolyq paıdalanylmaı otyr. Memlekettiń negizgi nazary osy salalar boıynsha orta bıznesti damytýǵa baǵyttalady, – dedi E.Saǵynaev.

Kásipkerlerdiń týyndaǵan problemalyq máselelerin jedel qaraý jáne sheshý maqsatynda Bıznes máselelerin sheshý jónindegi eksperttik top quryldy. Osy top aıasynda memlekettik qoldaýǵa bólingen qarajattyń tıimdiligine taldaý júrgiziledi.

Aıta keteıik, elimizde ShOB sýbektilerin jeńildikpen qarjylandyrý baǵdarlamasy ázirlenip jatyr.