Shaǵyn nesıesin ótemegen azamattardyń 2,5 mln qujaty jeke sot oryndaýshylardyń qolynda júr

ASTANA. KAZINFORM – Májilis tóraǵasynyń orynbasary Dánııa Espaevanyń aıtýynsha, 15,9 trln teńgeniń borysh qujaty jeke sot oryndaýshylardyń qolynda júr.

- Búginde respýblıka boıynsha 2 110 jeke sot oryndaýshysy jumys isteıdi. Olardyń is júrgizýinde jalpy somasy 15,9 trln teńgeni quraıtyn, 5 mıllıondaı atqarýshylyq qujat bar. Atalǵan qujattyń 50 paıyzy shaǵyn nesıeler boıynsha óndirip alýǵa qatysty, - dedi ol sot oryndaýshylardyń qyzmetin arttyrýǵa arnalǵan Úkimet saǵatynda.

Depýtattyń paıymdaýynsha, bul halyqtyń moınyndaǵy nesıeniń shamadan tys ekenine dálel bola alady.

- 2022 jyly biz osyǵan uqsas taqyrypta Úkimet saǵatyn ótkizdik. Sol kezde berilgen usynystardyń bir bóligi áli kúnge deıin oryndalmaǵan. Mysaly, sot oryndaýshylarynyń sottarda shaǵym jasalatyn áreketteriniń tizbesin qysqartý, boryshkerlerdi izdestirý tıimdiligin arttyrý, boryshkerler men óndirip alýshylardyń derbes derekterine zańsyz qol jetkizýdi boldyrmaý sııaqty usynystar áli oryndalǵan joq, - dedi ol.

Buǵan deıin shaǵyn nesıe qaı salada kóp beriletinin jazǵan edik.