Shaǵyn kólemdi kemelerdi baqylaý TJM quzyryna ótti
ASTANA. KAZINFORM — Aktsııa barysynda 775 shaǵyn kólemdi keme tekserilip, 273 ákimshilik quqyq buzýshylyq anyqtaldy.
2026 jylǵy 1 shildeden bastap «Qazaqstan Respýblıkasynyń keıbir zańnamalyq aktilerine olardy Qazaqstan Respýblıkasynyń Konstıtýtsııasyna sáıkes keltirý, Qazaqstan Respýblıkasynyń saılaý, prokýratýra jáne áleýmettik qamsyzdandyrý týraly zańnamasyn jetildirý máseleleri boıynsha ózgerister men tolyqtyrýlar engizý týraly» zań kúshine endi.
Zańda shaǵyn kólemdi kemelerge qatysty memlekettik baqylaý jáne qadaǵalaý fýnktsııalaryn Kólik mınıstrliginen Tótenshe jaǵdaılar mınıstrligine berý kózdelgen.
Sý obektilerinde fýnktsııalardy berý, eń aldymen halyqtyń jappaı demalatyn oryndarynda azamattardyń qaýipsizdik deńgeıin odan ári arttyrýǵa, sondaı-aq ishki týrızmdi damytý jáne sý jaǵasynda demalýshylar sanyn ulǵaıtý jaǵdaıynda shaǵyn kólemdi kemelerdi paıdalanýǵa baılanysty oqıǵalardyń aldyn alýǵa keshendi tásildi qamtamasyz etýge baǵyttalǵan.
Avtomobıl kóligi jáne kóliktik baqylaý komıtetiniń aýmaqtyq organdarynyń fýnktsııalaryn berý qarsańynda 2026 jylǵy 1-30 maýsym aralyǵynda «Nazar aýdaryńyz! Shaǵyn flot!» shaǵyn kólemdi kemelerdi paıdalaný kezinde qaýipsizdik talaptarynyń buzylýynyń aldyn alýǵa baǵyttalǵan profılaktıkalyq is-sharalar júrgizildi.
Aktsııa barysynda 775 shaǵyn kólemdi keme tekserilip, 273 ákimshilik quqyq buzýshylyq anyqtaldy.
Eń kóp taralǵan zań buzý:
— basqarýǵa quqyǵy joq adamnyń shaǵyn kólemdi kemeni basqarý — 34 jaǵdaı;
— jeke qutqarý quraldarynsyz kemelerdi paıdalaný (qutqarý keýdesheleri, belbeýler, tósbelgiler) — 91 jaǵdaı;
— keme bortynan qoqys pen ózge de zattardy shyǵarý — 26 jaǵdaı;
— belgilengen tártippen tirkelmegen kemeni basqarý — 10 jaǵdaı;
— keme júrgizýshileriniń shaǵyn kólemdi kemelerdi paıdalanýdyń ózge de qaǵıdalaryn buzýy — 26 jaǵdaı;
Kólik mınıstrligi shaǵyn kólemdi kemelerdiń ıeleri men keme júrgizýshilerin sý obektilerindegi zańnama talaptary men qaýipsizdik qaǵıdalaryn múltiksiz saqtaýǵa shaqyrady.
Aıta ketelik 1 shildeden bastap shaǵyn kólemdi kemeler tekseriletini týraly jazǵan edik.
