Shaǵyn fýtboldan Qazaqstan quramasy álem chempıonatyn toptyq kezeńde aıaqtady

ASTANA. KAZINFORM — Shaǵyn fýtboldan Qazaqstan áýesqoılar quramasy Ázerbaıjan astanasy Baký qalasynda jalaýyn kótergen álem chempıonatynda jarysty toptyq kezeńde aıaqtady.

Olar úshinshi oıynda AQSh quramasyn 5:3 esebimen jeńdi. El quramasynan Álıhan Saıranov (8-mınýt), Ahata Jolshorın (10-mınýt), Aıbolat Adahmanov (16-mınýt), Ilıa Býrtovoı (49-mınýt), Dmıtrıı Dvırnyı (50-mınýt) mergendik tanytty. Oǵan amerıkandyq fýtbolshylar úsh golmen jaýap berdi.

Osylaısha Qazaqstan quramasy qarsylasynan 5:3 esebimen basym túsip, toptyq kezeńde úshinshi oryndy mise tutty. Saldarynan jarysty jalǵastyrýdan shet qaldy.
Bul toptan Polsha men Bosnıa jáne Gertsogovına quramalary shırek fınalǵa shyqty.
Qazirge deıin Qazaqstan quramasy Polshaǵa (1:2) ese jiberip, Bosnııa jáne Gertsogovınamen (1:1) teń tústi.

Otandastarymyz 2023 jyly álem chempıonatynda Rýmynııaǵa (2:2, penaltıden 11:12) ese jiberip, kúmis medal alǵan edi.

Bıyl atalǵan týrnırge barlyǵy 32 qurama qatysyp jatyr. Dúbirli doda Búkilálemdik shaǵyn fýtbol federatsııasy (WMF) aıasynda ótkizilip jatyr.

2015 jylǵy alǵashqy týrnırden bastap álem chempıonaty eki jylda bir márte uıymdastyrylady. Ol 2017 jyly Afrıkanyń Týnıs memleketinde bolsa, odan keıin 2019 jyly Aýstralııada, 2023 jyly Birikken Arab Ámirliginde jalaýyn kóterdi. Al 2021 jyly pandemııaǵa baılanysty ótken joq.

Qazirge deıin Chehııa 2015 jáne 2017 jyldarda chempıon atansa, 2019 jyly Meksıka, 2023 jyly Rýmynııa kýbokty tóbesine kóterdi.