Shaǵyn fýtboldan álem chempıonatynda Qazaqstan quramasy búgin ekinshi oıynyn ótkizedi

ASTANA. KAZINFORM - Shaǵyn fýtboldan Qazaqstan áýesqoılar quramasy Ázerbaıjan astanasy Baký qalasynda jalaýyn kótergen álem chempıonatynda búgin Bosnııa jáne Gertsogovınamen oınaıdy.

Kezdesý qazaqstandyq ýaqytpen 16:05-ke belgilengen. Oıyn «Qazsport» telearnasynan tikeleı efırde kórsetiledi.

Álem chempıonatyndaǵy alǵashqy oıynda Qazaqstan quramasy Polshaǵa 1:2 esebimen jol berdi.

Bıyl atalǵan týrnırge barlyǵy 32 qurama qatysyp jatyr. Dúbirli doda Búkilálemdik shaǵyn fýtbol federatsııasy (WMF) aıasynda ótkizilip jatyr.

Qazaqstan quramasy F tobynda AQSh, Bosnııa jáne Gertsogovına, Polshamen synǵa túsip jatyr.

Endi Qazaqstan quramasy budan keıin 26 mamyrda AQSh-pen oınaıdy.

Otandastarymyz 2023 jyly álem chempıonatynda Rýmynııaǵa (2:2, penaltıden 11:12) ese jiberip qoıdy.

2015 jylǵy alǵashqy týrnırden bastap álem chempıonaty eki jylda bir márte uıymdastyrylady. Ol 2017 jyly Afrıkanyń Týnıs memleketinde bolsa, odan keıin 2019 jyly Aýstralııada, 2023 jyly Birikken Arab Ámirliginde jalaýyn kóterdi. Al 2021 jyly pandemııaǵa baılanysty ótken joq.

Qazirge deıin Chehııa 2015 jáne 2017 jyldarda chempıon atansa, 2019 jyly Meksıka, 2023 jyly Rýmynııa kýbokty tóbesine kóterdi.

Álem chempıonaty 1 maýsymda máresine jetedi.