Shaǵyn bıznesten túsetin salyq 27,1%-ǵa ulǵaıdy
ASTANA. KAZINFORM — Elimizde 2026 jyldyń alǵashqy toǵyz aıynda shaǵyn kásipkerlikten bıýdjetke túsken salyq kólemi 3,52 trln teńgege jetti. Bul byltyrǵy osy kezeńmen salystyrǵanda 27,1%-ǵa kóp. Bul derek Premer-mınıstrdiń orynbasary — Ulttyq ekonomıka mınıstri Serik Jumanǵarınniń depýtattyq saýalǵa bergen jaýabynda keltirilgen.
Qujatqa sáıkes, 2026 jylǵy 1 qazandaǵy jaǵdaı boıynsha Qazaqstannyń shoǵyrlandyrylǵan bıýdjetine túsken salyq túsimderi 22,69 trln teńge. Byltyrǵy toǵyz aımen salystyrǵanda bul kórsetkish 3,55 trln teńgege, ıaǵnı 18,5%-ǵa ósken.
Onyń ishinde shaǵyn jáne orta kásipkerlik sýbektilerinen túsken salyq kólemi 7,58 trln teńgege jetti. 2025 jyldyń osy kezeńinde bul soma 6,45 trln teńge bolǵan.
— Shaǵyn jáne orta kásipkerlik sýbektilerinen túsetin túsim 1 trln 128,2 mlrd teńgege nemese 17,5%-ǵa ósti, — delingen Serik Jumanǵarınniń jaýabynda.
Shaǵyn kásipkerlik boıynsha ósim anaǵurlym joǵary. Osy sanattaǵy sýbektilerden túsken salyq 2,77 trln teńgeden 3,52 trln teńgege deıin kóbeıgen. Aıyrmasy — 750,7 mlrd teńge.
Orta kásipkerlik sýbektileriniń bıýdjetke tólegen salyǵy da artty. Toǵyz aıda bul kórsetkish 2,89 trln teńge boldy. Byltyrǵy sáıkes kezeńde 2,63 trln teńge túsken edi, ıaǵnı ósim 252,6 mlrd teńgeni nemese 9,6%-dy qurady.
Al iri kásipkerlik sýbektilerinen túsken salyq túsimderi 12,69 trln teńgeden 15,11 trln teńgege deıin ulǵaıǵan. Bul — 2,42 trln teńge nemese 19,1% ósim.
Depýtattyq saýalda salyq reformasynyń shaǵyn jáne orta bızneske yqpaly kóterilgen. Oǵan jaýap bergen Serik Jumanǵarın reformanyń nátıjesin tek tirkelgen kásipkerlerdiń sanyna qarap baǵalaý jetkiliksiz ekenin atap ótken. Onyń aıtýynsha, kásipkerlik kirisi, jumyspen qamtý deńgeıi jáne bıýdjetke túsetin salyq kólemi de eskerilýge tıis.
Salyq reformasynyń saldaryn tolyq baǵalaý 2026 jyldyń qorytyndysy boıynsha júrgiziledi.
Aıta keteıik, buǵan deıin salyq bereshegine baılanysty shekteýler jaıly jazǵan edik.
