Shaǵyn bıznestegi moratorıı alynǵanymen, tekserýler eki ese azaıady – Álibek Qýantyrov

1 qańtardan bastap bıznes nysandaryna tekserýdi jasandy zeıin taǵaıyndaı bastaıdy. Ulttyq ekonomıka mınıstri 2025 jyly kúshine enetin Salyq kodeksin talqylaǵan jıynda shaǵyn bıznesti tekserýge qoıylǵan moratorıı kúshin joıǵanymen, tekserýler burynǵydaı kóp bolmaıtynyn aıtty, dep habarlaıdy Kazinform.

«Sheshim shyǵyp qoıdy ǵoı. Shaǵyn jáne mıkro bıznesti tekserýge qoıylǵan moratorıı byltyr uzartylǵan. Negizi byltyr bitýi kerek edi. Bir jylǵa uzartyldy. ıAǵnı, bıyl bitedi. Byltyr jyl boıy Úkimet bıznespen, sarapshylarmen birge bızneske qatysty quqyqtyq-normatıvtik aktilerdi saraptap shyqty. 25 myń aktidegi 128 myń talapty taldadyq. 10,1 myń talapty tıimsiz, ózektiligi joq dep tanydyq. Zańdarǵa qosymsha 9 myń talapty alyp tastadyq. Taǵy 1 myń talap qaldy, qazir Májilistiń qaraýynda jatyr. 1 qańtardan bastap olar da kúshin joıady», - dedi mınıstr.

Onyń sózinshe, 1 qańtardan bastap búkil salada syn-qaterlerdi basqarý júıesi engiziledi.

«Bul ne degen sóz? Tekserýler adamnyń qatysynsyz taǵaıyndalady. ıAǵnı, avtomattandyrylady. Tipti keıbir tusta jasandy zeıin elementteri iske qosylady. Olar syn-qaterlerdiń túrine qaraı tekserýler taǵaıyndaıdy. Demek, tekserýler azyraq bolady. Tekserýlerdiń sanyn 2 ese azaıtý josparlanyp otyr. Sáıkesinshe, aıyppuldar sany da azaıady», - dedi Álibek Qýantyrov.