Shaǵyn bıznesti úsh jyl teksermeıdi: Prezıdent mańyzdy málimdeme jasady
ASTANA. KAZINFORM — Memleket basshysy Qarmet kompanııasynyń uıymshyl ujymy tolaıym tabysqa tabandy eńbektiń arqasynda jetkenine toqtaldy, dep habarlaıdy Aqordanyń baspasóz qyzmeti.
Ol Qarmet jumysshylarynyń eren eńbegi, kásibıligi men óz isine adaldyǵy kompanııany órge jeteleıtinin aıryqsha atap ótti.
— Osy jıynǵa byltyr eń joǵary erekshelik belgisi — «Qazaqstannyń Eńbek Eri» ataǵyna ıe bolǵan Sergeı Petrovıch Chernobaı qatysyp otyr. Sizderdiń aralaryńyzda Qarmet kompanııasynyń burynǵy dańqyn qaıta oraltý úshin aıanbaı eńbek etip júrgen azamattar barshylyq. Jemisti jumystaryńyz zor qurmetke laıyq. Memlekettiń saıasaty ozat jumysshylar men mamandardy yntalandyrýǵa baǵyttalǵan. Byltyr sizderdeı eńbekqor jandarǵa iltıpat kórsettik. Biraq memlekettiń sizderge, ıaǵnı óndiris jumysshylaryna jáne aýyl sharýashylyǵy eńbekkerlerine degen izet-qurmeti ózgermeıdi. Biz sizderdi árdaıym qoldaımyz. Sondyqtan men elimizdiń ındýstrııasy men ónerkásibin damytýǵa eleýli úles qosqan bir top azamatty memlekettik nagradalarmen marapattaý týraly Jarlyqqa qol qoıdym. Bul — Otanymyzdyń ıgiligi úshin jasaǵan eseli eńbekterińizge berilgen laıyqty baǵa, — dedi Memleket basshysy.
Sondaı-aq Prezıdent bızneske jan-jaqty qoldaý kórsetý qajettigin málimdedi.
— Joldaýymda memleket shaǵyn bıznesti qoldaý úshin birqatar shara qabyldaıtynyn, sonyń ishinde aldaǵy úsh jylda tekseristen bosatatynyn aıtqanymdy bilesizder. Shaǵyn bıznes jańa salyq sharttaryna oıdaǵydaı beıimdelýi úshin oǵan qazir qol ushyn sozý kerek dep oılaımyn. Kredıtti arzandatý maqsatynda kásiporyndardy qarjylandyrý máselesin de pysyqtaǵan jón, — dedi Qasym-Jomart Toqaev.
Osydan buryn Prezıdent Qarmet mıllıardtaǵan shyǵynnan arylyp, taza paıdaǵa shyqqanyn aıtty.
Buǵan deıin Memleket basshysy Qarmet konverter tsehynyń jumysymen tanysqanyn jazǵanbyz.
