Shaǵyn bıznesti qoldaıtyn «Іsker aımaq» baǵdarlamasy ázirlendi – Serik Jumanǵarın

ASTANA. KAZINFORM – Premer-mınıstrdiń orynbasary – Ulttyq ekonomıka mınıstri Serik Jumanǵarın Prezıdenttiń Quryltaıda bergen tapsyrmalary boıynsha kásipkerlerge qandaı qoldaý kórsetiletinin aıtyp berdi.

Mınıstr ekonomıkanyń turaqty damýynyń mańyzdy faktory – shaǵyn jáne orta bıznes ekenin atap ótti.

– Ákimshilik júktemeni azaıtyp jáne qoldaý kórsete otyryp, bıznes júrgizý jaǵdaılaryn jaqsartý boıynsha júıeli sharalar jalǵasady. Basymdyq beriletin salalarda kásipkerlik qyzmetti yntalandyrý úshin «Órleý» jeńildetilgen qarjylandyrý baǵdarlamasy iske qosyldy, – dedi S. Jumanǵarın búgingi Úkimet otyrysynda.

Oǵan qosa, óńirlik mamandandyrý jobalaryna baǵdarlanǵan «Іsker aımaq» shaǵyn bıznesti qoldaýdyń biryńǵaı baǵdarlamasy ázirlendi.

Bul baǵdarlamany iske asyrý shamamen 23 myń jobany qoldaýǵa, 127 mlrd teńge bıýdjettik qoldaýmen, 1,2 trln teńge somasyna kredıt berýdi qamtamasyz etýge múmkindik beredi.

Aıta keteıik, Ulttyq Quryltaıda Májilis depýtaty Nurtaı Sabılıanov kásipkerlikke beriletin nesıeniń paıyzdyq mólsherlemesi tym joǵary ekenin aıtyp, jańa jeńildetilgen nesıe júıesin engizýdi usynǵan edi.