Shaǵyn bıznesti qoldaýdyń óńirlik baǵdarlamalaryn ázirleý mańyzdy — Bektenov

ASTANA. KAZINFORM — Búgin Úkimet otyrysynda Premer-mınıstr Oljas Bektenov Qarjy mınıstrligine «Іsker aımaq» baǵdarlamasyn qarjylandyrýdy qamtamasyz etýdi tapsyrdy.

— Qarjy mınıstrligi «Іsker aımaq» baǵdarlamasyn qarjylandyrýdy qamtamasyz etsin. Baǵdarlamany jergilikti bıýdjetter esebinen de qosa qarjylandyrý kózdelýi qajet. Óńir ákimdikteri birinshi deńgeıdegi sýbsıdııalardy bólý úshin aımaqtardyń ereksheligin eskere otyryp, barynsha qysqa merzimde basym salalardyń tizbesin qalyptastyrsyn. Shaǵyn bıznestiń óndiristik ınfraqurylymǵa qoljetimdiligin qamtamasyz etip, óndiristik ǵımarattardy jeńildikpen jalǵa alýyna múmkindik jasaǵan jón, — dedi Úkimet basshysy.

Sonymen qatar Oljas Bektenov shaǵyn bıznesti qoldaýdyń óńirlik baǵdarlamalaryn ázirleý mańyzdy is ekenin atap ótti. 

— Máselen, Almaty qalasynda kásipkerlikti damytý baǵdarlamasy aıasynda bıyl jergilikti bıýdjetten shaǵyn jáne orta bıznesti damytýǵa 25,5 mıllıard teńge bólindi. Bul jalpy memlekettik qoldaý sharalarymen qamtylmaǵan, qala úshin neǵurlym basym baǵyttardyń damýyn yntalandyrýǵa múmkindik berdi. Tabysty mysaldardyń biri retinde qalada jyldyq 6%-ǵa deıin jeńildikti nesıeler berý arqyly shaǵyn ónerkásiptik parkterdi damytý isin aıtýǵa bolady. Basqa da óńirlerde oń tájirıbe bar. Ony búkil elimiz boıynsha keńinen taratý qajet, — dedi Premer-mınıstr.

Buǵan deıin «Іsker aımaq» baǵdarlamasy qandaı baǵyttarda iske asyrylatynyn jazǵan edik.