Shaǵyn bızneske qoldaý: otandyq ónimge basymdyq berý usynyldy
ASTANA. KAZINFORM — Saýda jáne ıntegratsııa mınıstrligi ishki saýda sýbektterine jeke kásipkerlikti memlekettik qoldaý sharalaryn kórsetý qaǵıdalaryna ózgerister engizý jónindegi jobany qoǵamdyq talqylaýǵa shyǵardy.
Qujat «Ashyq NQA» portalynda jarııalanyp, 20 aqpanyna deıin talqylanady.
Joba shaǵyn bıznesti praktıkalyq turǵyda qoldaýdy kúsheıtýge jáne qazaqstandyq óndiristiń damýyn yntalandyrýǵa baǵyttalǵan. Usynylyp otyrǵan ózgerister memlekettik baǵdarlama sharttaryna áser etip, memlekettik qoldaý sharalaryn alýshylar úshin kásipkerlerdiń múddelerin qorǵaýǵa basymdyq bere otyryp, qarsy mindettemelerdi kúsheıtýdi kózdeıdi.
Negizgi usynystardyń biri – saýda nysany úshin memlekettik qoldaý alǵan, ıaǵnı nesıeniń syıaqy mólsherlemesiniń bir bóligin sýbsıdııalaý jáne nesıeler boıynsha kepildik alǵan kásipkerge bir jyl ishinde jaldaý qunyn ósirýge shekteý qoıylady. Bul shara jalǵa alynǵan alańdarda jumys isteıtin shaǵyn jáne orta bıznes, sondaı-aq jeke kásipkerler úshin erekshe mańyzdy. Ol shyǵyndardyń boljamdylyǵyn qamtamasyz etip, qyzmetti josparlaýǵa múmkindik beredi jáne jaldaý aqysynyń kenetten ári negizsiz ósý qaýpin tómendetedi.
Sonymen qatar joba aıasynda qazaqstandyq taýar óndirýshilerdiń tizilimine engizilgen jańa qazaqstandyq brendterdiń taýarlaryn saýda alańdarynda jáne sórege jeńildetilgen sharttarmen ornalastyrý kózdelgen. Bul óndirýshiniń jazbasha ótinishi negizinde úsh aıdan odan da uzaq merzimge júzege asyrylady. Usynylyp otyrǵan ózgerister jańa otandyq brendter úshin naryqta ózin tanytýǵa jáne damýǵa qajetti bastapqy múmkindik beredi.
Budan bólek, aınalym qarajatyn tolyqtyrý kezinde qaǵıdalarda taýarlardy, shıkizat pen materıaldardy qazaqstandyq taýar óndirýshiler tizilimine engizilgen kásipkerlerden satyp alý talaby bekitiledi. Bul sheshim ishki kooperatsııany damytýǵa, jergilikti jetkizý tizbekterin qoldaýǵa jáne ımportqa táýeldilikti azaıtýǵa baǵyttalǵan.
Jalpy alǵanda, usynylyp otyrǵan normalardy iske asyrý shaǵyn bıznes máselelerin sheshýge júıeli kózqarasty kórsetip, uzaq merzimdi ekonomıkalyq áser qalyptastyrýǵa múmkindik beredi. Nátıjesinde shaǵyn óndirýshiler sanynyń artýy, otandyq taýarlar assortımentiniń keńeıýi jáne jańa jumys oryndarynyń qurylady dep josparlanǵan.
Jobany talqylaý 20 aqpanǵa deıin jalǵasady. Saýda jáne ıntegratsııa mınıstrligi barlyq múddeli tulǵalardy «Ashyq NQA» portalynda qoǵamdyq talqylaýǵa qatysýǵa shaqyrady.
Aıta ketelik ózindik ereksheligi bar taýarlardy ákelý úshin lıtsenzııa qajet.