Shaǵyn bızneske bıyl da salyqtyq jeńildik beriledi
ASTANA. KAZINFORM – Memlekettik kirister komıteti 2026 jyly mıkro jáne shaǵyn kásipkerlik sýbektilerine salyqtyq ákimshilendirýdi jeńildetý sharalary jalǵasatynyn málimdedi.
Qazaqstan Úkimetiniń sheshimine sáıkes, 2026 jylǵy 1 qańtar men 31 jeltoqsan aralyǵynda mıkro jáne shaǵyn bıznes sýbektilerine salyqtar men bıýdjetke tólenetin tólemder boıynsha merziminde tólenbegen somalarǵa ósimpul eseptelmeıdi.
Bul jeńildik avanstyq jáne aǵymdaǵy tólemderge de qoldanylady.
- Alaıda atalǵan shara tólem kózinen ustalatyn salyqtarǵa, ımporttalatyn aktsızdeletin taýarlar aktsızine, ımporttyq qosylǵan qun salyǵyna jáne áleýmettik tólemderge qatysty qoldanylmaıdy, - dep eskertti vedomstvodan.
Memlekettik kirister komıtetiniń málimetinshe, 2026 jylǵy 31 jeltoqsannan keıin qosymsha salyq eseptiligi usynylǵan nemese memlekettik kirister organdary salyq somalaryn qaıta eseptegen jaǵdaıda ósimpul esepteledi.
Mamandar bul sheshim kásipkerlerge túsetin ákimshilik júktemeni azaıtyp, memleket pen bıznes arasyndaǵy ashyq ári senimdi áriptestikti nyǵaıtýǵa baǵyttalǵanyn atap ótti.
Aıta keteıik, mıkro jáne shaǵyn kásipkerlikti qoldaý sharalary Qazaqstanda ekonomıkany yntalandyrýdyń negizgi baǵyttarynyń biri sanalady.
Buǵan deıin Májilis depýtattary Salyq kodeksine ózgeris engizý týraly qujatty qaraıtyny habarlandy.
