Shaǵyn bızneske 200 mln teńgege deıin nesıe alýǵa qalaı bolady
ASTANA. KAZINFORM — Qazaqstanda shaǵyn bıznesti qoldaýǵa baǵyttalǵan «Іsker aımaq» baǵdarlamasy boıynsha sýbsıdııalaýdyń jańa erejeleri kúshine endi. Baǵdarlamany «Damý» kásipkerlikti damytý qory júzege asyrady.
Ózgerister Qazaqstan Respýblıkasy Úkimetiniń 2026 jylǵy 18 tamyzdaǵy № 729 qaýlysymen bekitildi.
Ne ózgerdi?
Baǵdarlamaǵa salalyq shekteýsiz áleýmettik kásipkerlik sýbektileriniń jobalary engizildi. Olar áleýmettik kásipkerlik sýbektileriniń tiziliminde kórsetilgen qyzmet túrleri boıynsha baǵdarlamaǵa qatysa alady. Bul rette jobany iske asyrý orny men kásipkerdiń tirkelgen jeri eskeriledi.
Áleýmettik kásipkerler úshin sýbsıdııalaý mólsheri syıaqynyń nomınaldy mólsherlemesiniń 50%-yn, al basqa kásipkerler úshin 40%-yn quraıdy.
Óńir ákimdikteri Qazaqstan Respýblıkasynyń oblystary men aýdandary boıynsha ekonomıkalyq qyzmettiń basym túrleri retinde qosymsha alty EQJJ kodyn aıqyndaı alady.
Investıtsııalyq jobalardyń otandyq ónimge baǵyttalýy kúsheıtildi. Investıtsııalyq shyǵyndarǵa kommertsııalyq jyljymaıtyn múlik, tehnıka jáne kólik quraldaryn satyp alý, sondaı-aq bıznes nysandaryn salý, jańǵyrtý, rekonstrýktsııalaý jáne kúrdeli jóndeý jumystary jatady.
Bul rette ınvestıtsııalyq joba aıasynda jabdyq, tehnıka, kólik quraldary, qurylys materıaldary jáne basqa da aktıvter tıisti Tizilimge engizilgen qazaqstandyq taýar óndirýshilerden satyp alynýy tıis. Eger Tizilimde qajetti taýar bolmasa, ony basqa óndirýshilerden satyp alýǵa ruqsat etiledi.
Investıtsııalyq jobalardy iske asyrý merzimi sýbsıdııalaý bastalǵan kúnnen bastap 24 aıdan 18 aıǵa deıin qysqartyldy. Zańnamaǵa eleýli ózgerister engizilgen nemese kútpegen tehnıkalyq, ekonomıkalyq jáne óndiristik jaǵdaılar týyndaǵan jaǵdaıda bul merzim alty aıdan aspaıtyn ýaqytqa uzartylýy múmkin.
Jobalardyń tıimdilik krıterıılerin baǵalaý tártibi de naqtylandy. Ózgerister kiris deńgeıi men eńbekaqy tóleý qorynyń (ETQ) kórsetkishterine qatysty.
Endi kiris pen ETQ-tyń naqty ósim deńgeıiniń jınaqtalǵan ınflıatsııa deńgeıinen tómen aýytqýyna 1 paıyzdyq tarmaqtan aspaıtyn shekte jol beriledi.
Sonymen qatar kásipkerge baılanysty emes obektıvti jaǵdaılar týyndaǵan kezde, joba iske asyrylyp, qarajattyń maqsatty paıdalanylǵany rastalsa, tıimdilik kórsetkishterine qol jetkizý úshin qosymsha bir qarjy jylyna deıingi merzim beriledi.
Inflıatsııa deńgeıi, onyń ishinde jınaqtalǵan ınflıatsııa týraly aqparat QR Strategııalyq josparlaý jáne reformalar agenttigi Ulttyq statıstıka bıýrosynyń resmı saıtynda jarııalanady.
Sýbsıdııa berý tetigi ózgerdi
Ekinshi deńgeıdegi bankter men lızıngtik kompanııalar arasynda lımıtterdi bólý alynyp tastaldy.
Endi kásipker Qordyń seriktes kez kelgen ekinshi deńgeıdegi bankine nemese lızıngtik kompanııasyna júgine alady.
Qarjylandyrý maquldanǵannan keıin joba «Damý» qoryna joldanady. Qor bes jumys kúni ishinde sýbsıdııa berý týraly sheshim qabyldaıdy.
Oń sheshim qabyldanǵan jaǵdaıda «Damý» qory, ekinshi deńgeıdegi bank nemese lızıngtik kompanııa jáne kásipker arasynda sýbsıdııalaý týraly úshjaqty shart jasalady.
Sonymen qatar Erejelerge kásipkerge Qordyń sýbsıdııa berýden bas tartý týraly sheshimine QR zańnamasyna sáıkes ákimshilik jáne (nemese) sot tártibimen shaǵymdanýǵa múmkindik beretin norma engizildi.
Qarjylyq emes qoldaý
«Damý» qory shaǵyn jáne monoqalalarda, aýdan ortalyqtary men aýyldyq eldi mekenderde mobıldi front-ofıster jobasyn júzege asyryp jatyr.
Mobıldi front-ofıster kóshpeli konsýltatsııalyq alań retinde jumys isteıdi. Munda kásipkerler men bıznes bastaǵysy keletin azamattar qoldanystaǵy qoldaý quraldary týraly tegin aqparat alyp, sondaı-aq qarjylandyrýǵa ótinimdi sol jerde bere alady.
Baǵdarlamanyń negizgi sharttary:
• Qatysýshylar — mıkro jáne shaǵyn kásipkerlik sýbektileri, aýyl sharýashylyǵy kooperatıvteri jáne áleýmettik kásipkerlik sýbektileri;
• Nesıe somasy — 200 mln teńgege deıin;
• Maqsaty — ınvestıtsııalarǵa jáne aınalym qarajatyn tolyqtyrýǵa;
• Nomınaldy mólsherleme — QR Ulttyq Bankiniń bazalyq mólsherlemesi + 4%;
• Sýbsıdııa mólsheri — nomınaldy mólsherlemeniń 40%-y. Bul rette kásipker úshin syıaqy mólsherlemesi keminde 12,6% bolady. Áleýmettik kásipkerler úshin — 50%;
• Sýbsıdııalaý merzimi — 3 jylǵa deıin.
Qalaı qatysýǵa bolady?
Baǵdarlamaǵa qatysý úshin kásipker «Damý» qorynyń seriktes ekinshi deńgeıdegi bankine nemese lızıngtik kompanııasyna júginip, qarjylandyrýǵa ótinim berýi qajet.
Qarjylandyrý maquldanǵannan keıin joba sýbsıdııa berý týraly sheshim qabyldaý úshin «Damý» qoryna qaraýǵa jiberiledi.
Kásipkerler bıznesti qoldaý baǵdarlamalary boıynsha keńes alý úshin joba iske asyrylatyn óńirdegi «Damý» qorynyń fılıalyna júgine alady.
Qosymsha aqparatty Qordyń resmı saıtynan alýǵa bolady. Sondaı-aq 1408 biryńǵaı baılanys ortalyǵynyń nómiri arqyly keńes alýǵa múmkindik bar.
