Shaǵyn bıznes kooperatsııasy ekonomıkalyq ósimge áser etedi – sarapshy
ASTANA. KAZINFORM – Shaǵyn jáne orta bıznes kooperatsııasynyń ekonomıkaǵa paıdasy zor. Onyń arqasynda jańa jumys oryndary ashylyp, kedeılik deńgeıi tómendeıdi. Bul jóninde Halyqaralyq kooperatıvtik alıansy Saýda jáne bıznes boıynsha komıtetiniń (Azııa-Tynyq muhıty aımaǵy, Nıý-Delı) múshesi Sýmıt Sıngh málimdedi.
Ol «Túrki memleketteri uıymy elderiniń ekonomıkalyq ıntegratsııasy jáne yntymaqtastyǵy: óndiris, agroónerkásiptik keshen, logıstıka jáne tsıfrovızatsııa salalaryndaǵy jańa múmkindikter» bıznes forýmynda atalǵan taqyrypqa toqtaldy.
— Biz shaǵyn kásiporyndardy saýda kooperatsııasy damýynyń negizgi qozǵaýshysy retinde qarastyramyz. Olar ekonomıkany órge bastyrady. Biz shaǵyn bıznes sýbektilerin shaǵyn ındýstrıalızatsııa modeline biriktiremiz. Sonyń arqasynda jańa jumys oryndary ashylady, ónim kórsetkishi ósedi jáne turaqty tabysty qamtamasyz etedi, — dedi sarapshy.
Onyń aıtýynsha, kooperatsııalyq modelder shaǵyn bızneske tabysty qaıta ınvestıtsııalaýǵa, taýarlardyń keshigip jetýin azaıtýǵa, sondaı-aq, ekonomıkanyń turaqtylyǵyn uzaq merzimdi turǵyda nyǵaıtýǵa múmkindik beredi.
Sonymen birge, Sýmıt Sıngh halyqaralyq tájirıbege toqtaldy. Úndistan, Japonııa jáne Ońtústik Koreıa sekildi elderde kooperatsııa aýyl sharýashylyǵyn, jumyspen qamtýdy, tehnologııalyq damýdy ilgeriletý quraly retinde qoldanylady.
— Kooperatsııa jergilikti kásipkerlikti órkendetýge jáne turaqty ekonomıkalyq júıeni qalyptastyrýǵa yqpal etedi. Odan bólek, kedeılik deńgeıi tómendep, halyqqa jańa múmkindikterge jol ashady, — dedi ol.
Sonymen qatar, shaǵyn kásiporyndar naryqqa enip, ekonomıkalyq júıelerge ıntegratsııalanýyna jaǵdaı jasaý da mańyzdy.
Aıta keteıik, buǵan deıin TMU bıznes forýmynda eki memorandýmǵa qol qoıylǵanyn jazǵanbyz.
