Shaǵyn avıatsııany damytýǵa ne kedergi – Úkimet basshysynyń jaýaby

ASTANA. KAZINFORM – Premer-Mınıstr Oljas Bektenov Senat depýtattarynyń shaǵyn avıatsııany damytýǵa qatysty saýalyna jaýap berdi.

«Búginde azamattyq áýe kemeleriniń memlekettik tiziliminde jeńil jáne óte jeńil avıatsııanyń 690 áýe kemesi bar. Onyń 179-y avıatsııalyq-hımııalyq jumystardy, al 126-sy halyqqa medıtsınalyq kómek kórsetý, sanıtarlyq is-sharalardy júrgizý úshin ushýlardy oryndaý úshin jiberilgen», - dedi Úkimet basshysy jaýabynda.

Premer-Mınıstrdiń sózine qaraǵanda, shaǵyn avıatsııanyń damýyna óńirlik áýejaılardy jańǵyrtý is-sharalaryna qarajattyń kóp qajet etilýi negizgi tejeýshi faktor bolyp tur.

«Bul máseleni sheshý úshin Qazaqstan Respýblıkasynyń kólik-logıstıkalyq áleýetin damytý tujyrymdamasy bekitildi. Onyń aıasynda 2030 jylǵa deıin áýejaılardyń ınfraqurylymyn jańǵyrtý kózdelgen. Aıtalyq, búginde Úrjar, Úsharal, Zaısan, Katonqaraǵaı, Qarqaraly, Ulytaý jáne Arqalyq qalalary áýejaılaryn salý jáne jańǵyrtýdyń nysanalyǵyn anyqtaý jumystary júrgizilip jatyr», - dedi Oljas Bektenov.