Shaǵyn avıatsııany damytý: Aqtóbeniń tórt aýdanyna aerodrom salynady
AQTÓBE. KAZINFORM – Shaǵyn aerodrom Shalqar, Muǵaljar, Yrǵyz jáne Baıǵanın aýdandarynda boı kóteredi. Bul joba 2026–2030 jyldarǵa arnalǵan oblysty damytý josparyna engizildi.
Aqtóbe oblystyq jolaýshylar kóligi jáne avtomobıl joldary basqarmasy basshysynyń orynbasary Eset Amanbaevtyń aıtýynsha, aýdandarmen qatar Aqtóbe qalasyndaǵy halyqaralyq áýejaıda da qurylymdyq bólimshe ashylady.
- 2026–2030 jyldarǵa arnalǵan oblysty damytý josparyna ózgerister engizildi. Shaǵyn avıatsııany damytý nysanaly ındıkatorynda úsh is-shara bar. Birinshiden, aerodromdardyń qurylysy. Shalqarda eki, Muǵaljar, Yrǵyz jáne Baıǵanın aýdardarynda bir-birden aerodom salynady. Ekinshiden, Á.Moldaǵulova halyqaralyq áýejaıy bazasynda qurylymdyq bólimshe ashylady. Munda ushqyshtar, qyzmet kórsetýshi mamandar toptastyrylady. Úshinshiden áýe kemesin satyp alý kerek,- dedi Aqtóbe oblystyq jolaýshylar kóligi jáne avtomobıl joldary basqarmasy basshysynyń orynbasary Eset Amanbaev.
Aqtóbe oblysy boıynsha joba aldymen Shalqar qalasynda iske asyrylady. Bul jol qysqartýmen qatar shuǵyl medıtsınalyq kómekke tıimdi. Іshki týrızm men kásipkerlikti damytý josparlanyp otyr.
Eske salsaq, Úkimet basshysy Oljas Bektenov elde shaǵyn avıatsııany damytý qajet ekenin aıtty. Al kadrlardy daıarlaý kezinde avıatsııa salasyndaǵy qoldanystaǵy oqý ortalyqtaryn paıdalanǵan jón dep sanaıdy.
