Shabyt: Jumysshylarǵa páter men kólik alýǵa kómektemetin jańa júıe

ASTANA. KAZINFORM — Qazaqstandyq jas qyzmetkerlerdi yntalandyratyn jańa platforma oılap tapty. Ol qyzmetkerlerdiń páter men kólik satyp alý úshin qarajat jınaýyna kómektesedi.

— Qazaqstanda jumys isteıtin qyzmetkerlerdiń 40 paıyzy páter ala almaıdy. Sebebi óte qarapaıym. Mysaly, 18-ge endi ǵana tolǵan jas jetkinshek kúndelikti júrip-turýyna aqsha kerek bolǵandyqtan baryp jumys isteıdi. Ol daıashy, barısta sekildi túrli jumys isteýi múmkin. Sol úshin jalaqy alady. Biraq kásipkerler salyq tólemeý úshin túrli aıla-sharǵyǵa barady. Sonyń saldarynan keıbireýlerdiń zeınetaqy qoryna aqsha jınalmaı qalady, — deıdi Elaman Seıilbek.

Joba avtory jańa platformany jumys berýshilerge arnap shyǵarǵanyn aıtady.

— Meniń jobam Shabyt dep atalady. Óıtkeni ózim jumysta júrip, ıdeıalar kelgen kezde shabyttanamyn. Solaı kelgen ıdeıalarymdy júzege asyramyn. Ol ıdeıany júzege asyrý úshin maǵan aqy tóleý kerek. Eger sen jumys istep júrseń, seni jumysqa alǵan kásipker saǵan páter jáne kólik alýǵa óz úlesin qosýy kerek. Al aı saıynǵy jalaqy — ómir súrýge qajetti qarajat. Meniń jobam osy jaıynda. Bul jumys berýshilerge arnalǵan joba, — deıdi startap jobanyń avtory.

Elaman Seıilbek elimizdegi kóptegen daryndy azamat jetkilikti deńgeıde baǵalanbaı jatqanyn jetkizdi.

— Men Máskeýde boldym. Árıne, onda naryq keń. Biraq ondaǵy adamdardyń bazalyq qajettilikteri ótelgen. Al Qazaqstanda olaı emes. Taksımen kóp júremin. Taksı júrgizýshilerimen áńgimelesseńiz, «Men ekonomıst mamandyǵyn bitirgenmin, mynadaı jerlerde jumys istedim. Biraq bastyǵymnan sharshap kettim, ol meni tyńdamaıdy, sol úshin taksı qyzmetine kettim» dep aıtady. Ol adamnyń qazaqqa tıgizer paıdasy kóp edi. Biraq ol qazir taksı júrgizip júr. Sol úshin men qazirgi ýaqytta jumys istep júrgen 11 mıllıon qazaqqa osy jobany oılap taptym. Shabyt dep ataǵan sebebim — bizge ıdeıa shabytpen keledi, — deıdi ol.

Jańa platforma qarjyny tıimdi jınaýǵa da járdemdesedi eken.

— Platformada eki túrli múmkindik bar. Biri — Shabyt QR, ekinshisi — elektrondy ámııan. Bul júıede bankterdegideı jyl saıyn 12 paıyzben jınaǵan aqshańa ústeme qosylady. Qazir biz «Otbasy bankpen» birge arnaıy pılottyq joba jasap jatyrmyz. Bizde de týra sondaı rettik nómiri bar depozıt ashylady. Mysaly, kóp qyzmetkerdiń «Otbasy bankte» shoty joq. Olardyń Otbasy bankke baryp, ıpoteka jaıly suraýǵa ýaqyty da joq. Sol úshin biz olarǵa «Sender jumys isteńder, óz eńbekterińmen qarjylaryńdy tabyńdar. Al biz senderdi barlyq qajetti nársemen qamtamasyz etemiz» dep aıtamyz, — deıdi joba avtory.

Alaıda bul jobany tolyqtaı júzege asyrý úshin qyrýar qarajat kerek.

— Qazir biz Qazaqstandaǵy úlken kompanııalarmen pılottyq jobalardy júzege asyryp jatyrmyz. Negizi kez kelgen gıpoteza dáleldeýdi qajet etedi. Qazir mende gıpoteza bar. Basqa kompanııalarǵa ıdeıa unap jatyr. Alaıda platformany tolyqtaı jasap, jaryqqa shyǵarý úshin 50–60 mıllıon teńge qajet, — deıdi Elaman Seıilbek.

Aıta keteıik, qarjylyq monıtorıngi agenttigi «Zań jáne tártip» normatıvi aıasynda qarjylyq qaýipsizdik taqyryptaryna arnalǵan mýltfılmder tsıklyn iske qosty.