«Shabyt» jastar baıqaýyna jýrnalıstıka atalymy qaıtadan engizildi
ASTANA. QazAqparat - «Shabyt» halyqaralyq shyǵarmashyl jastar festıvaliniń baǵdarlamasyna «Jýrnalıstıka» atalymy Astananyń 20 jyldyǵyn merekeleýge oraı alty jyldan soń qaıta engizildi, dep habarlaıdy QazAqparat qalalyq Mádenıet jáne sport basqarmasyna silteme jasap.
Atalmysh baıqaýda jastar bes nomınatsııa boıynsha básekege túspek. Atap aıtqanda, «Klassıkalyq mýzyka», «Halyq mýzykasy», «Estradalyq vokal», «Horeografııa» jáne «Jýrnalıstıka».
Bıylǵy baıqaý 5-9 qarasha aralyǵynda Beıbitshilik jáne kelisim saraıynda ótedi. Onda 16-35 jas aralyǵyndaǵy úmitkerler baq synaıdy.
Ár nomınatsııa boıynsha tolyq ereje baıqaýdyń saıtynda jáne elordalyq Mádenıet jáne sport basqarmasynyń saıtynda jarııalanǵan. Baıqaýǵa qatysatyn úmitkerler materıaldardy Astana qalasynyń Mádenıet jáne sport basqarmasyna (010000, Astana q., Beıbitshilik kóshesi, 11meken jaıy boıynsha) tapsyrady. Sonymen qatar, baıqaýǵa qatysýǵa ótinimdi saıt arqyly berýge múmkindik jasalǵan.
Tolyq aqparatty +7 (7172) 556771,+7 (7172) 557409 telefondary boıynsha Uıymdastyrý komıtetinen alýǵa bolady.
Ótinimderdi qabyldaý taǵy bes kúnge uzartyla otyryp 30 qazanǵa deıin jalǵasady.
Aıta keterligi, «Shabyt» halyqaralyq shyǵarmashyl jastar festıvali ústimizdegi jyly 21-shi ret ótkiziledi. Baıqaýǵa ótinimder qabyldaý qazan aıynyń basynda bastaldy.
