«Shabyt» shyńyna shyqqandar» - respýblıkalyq basylymdarǵa sholý
ASTANA. Qarashanyń 10-y. / QazAqparat/ - Qazaq aqparat agenttigi respýblıkalyq basylymdarda qarashanyń 10-y, seısenbi kúni shyqqan ózekti materıaldarǵa sholýdy usynady.
Keshe Úkimet úıinde Premer-Mınıstr Kárim Másimov elimizge resmı saparmen kelgen Belarýs Respýblıkasynyń Premer-Mınıstri Sergeı Sıdorskıımen kezdesti. Kezdesýde ár túrli salalar boıynsha Qazaqstan men Belarýs arasyndaǵy áriptestikti damytýǵa baılanysty máseleler talqylandy. Tolyǵyraq «Egemen Qazaqstan» basylymynyń búgingi sanyndaǵy «Áriptestik áleýeti keńeıe túspek» degen taqyryppen berilgen maqaladan oqı alasyzdar.
«Altaıda atqarylatyn is kóp»,- deıdi Shyǵys Qazaqstan oblysynyń ákimi Berdibek Saparbaev «Egemen Qazaqstan» gazetine bergen suhbatynda. Atalǵan basylymnyń «Ákimmen áńgime» aıdarymen berilgen suhbaty Shyǵys Qazaqstan oblysyndaǵy «Jol kartasy» baǵdarlamasy boıynsha atqarylyp jatqan ıgi ister jaıynda oı órbitedi.
Kórnekti qoǵam qaıratkeri, jazýshy, pýblıtsıst Sáken Seıfýllın «Eńbekshi qazaq» gazetinde ónegeli iz qaldyrǵany belgili. Professor Tursynbek Kákishevtiń «Sáken hám «Eńbekshi qazaq» taqyrybymen berilgen Sáken týraly maqalasynyń jalǵasyn atalǵan basylymnyń búgingi sanynan oqýǵa bolady.
***
Jabyq ǵımarattaǵy III Azııa oıyndarynan qazaqstandyq sportshylar oljaly oraldy. «Aıqyn» gazetiniń búgingi sanyndaǵy «21 altyn, 16 kúmis, 21 qola» degen taqyryptaǵy maqala osy qýanyshty jaǵdaımen tolyq habardar etedi.
T. Júrgenov atyndaǵy Óner akademııasynda qazaq halqynyń birtýar perzenti, óner qaıretkeri, belgili sahna sheberi, KSRO halyq ártisi, Memlekettik syılyqtyń ıegeri Asanáli Áshimovpen kezdesý boldy. Osydan 55 jyl buryn ózi de osy óner ordasynda bilim alǵan óner ıesi osy oraıly kezdesýde izbasar ini-qaryndastarynyń kókeıtesti suraqtaryna jaýap beripti. «Aıqyn» basylymynyń búgingi sanyndaǵy «Qazir Qazaqstanda kınoakter joq» degen taqyryptaǵy suhbatqa nazar aýdaryńyz.
***
Talaı jastardyń keýdesine úmit otyn tutandyryp, shyǵarmashylyǵyna serpilis bergen halqaralyq «Shabyt» festıvali elordada bıyl on ekinshi ret ótti. Bas shahardy án men kúıge terbegen festıval ótken jeksenbi kúni Beıbitshilik jáne kelisim saraıynda eń daryndy qatysýshylaryn anyqtap, olarǵa laıyqty júldelerin tapsyrdy. Tolyǵyraq «Astana aqshamy» basylymynyń alǵashqy betinen oryn alǵan «Shabyt» shyńyna shyqqandar» degen taqyryptaǵy maqaladan oqyńyzdar.
Osy taqyryptaǵy maqalany «Egemen Qazaqstan», «Aıqyn» gazetterinen de oqýǵa bolady.
«Salyq tóleý - turaqty ekonomıkanyń kepili. Ózińe óziń jaqsylyq jasaǵyń kelse, salyq tóleýdegi jaýapkershilikti sezine alǵan jón. Alaıda keıbireýler úshin munyń baıybyna barý, memleket aldyndaǵy basty jaýapkershilikti seziný múmkin bolmaı otyr», - dep jazǵan «Astana aqshamy» gazetiniń búgingi sanyndaǵy «Qara tizimge» iligip qalmańyz» degen taqyryppen berilgen kelesi maqala múlik salyǵyn tólemeıtinderge qatysty keleńsizdikti jazypty.
«Prezıdent Nursultan Nazarbaev keshe Belarýs Premer-mınıstri Sergeı Sıdorskııdi qabyldady. Kezdesý barysynda eki jaqty qarym-qatynastar men Qazaqstan Prezıdentiniń Belarýs Respbýlıkasyna josparlanyp otyrǵan aldaǵy saparynyń daıyndyq máseleleri talqylandy», dep jazady «Kazahstanskaıa pravda» gazeti búgingi seısenbilik nómirinde.
Úkimet astyqty Reseı, Ýkraına arqyly tasymaldaý máselesin arzandatý jaıyn sheshýi kerek. Óıtkeni, astyqtyń álemdik naryqtaǵy baǵasy qazaqstandyq dıqandarǵa tıimsiz deńgeıde qalyptasyp otyr. Astyq tóńiregindegi áńgimeni «KazPravda» «Astyq baǵyttary: ártaraptandyrý qajet» degen maqalada egjeı-tegjeıli jazǵan.
Al «Komsomolskaıa pravda-Kazahstan» basylymy Ońtústik Qazaqstan oblysynda shilde aıynda birneshe adamnyń qazazyna dýshar qylǵan kongo-qyrym bezgegi indetine baılanysty tergeý nátıjelerine úńilgen. Bul rette, vedomstvoaralyq komıssııa oblystyq densaýlyq saqtaý basqarmasynyń bastapqyda keltirgen qorytyndylaryna múlde kereǵar dáıekterdiń betin ashqany, ólgen adamdardyń denesine jasaldy degen medıtsınalyq saraptamanyń jalǵan ekendigi týraly derekter keltirilgen.
«Lıter» gazeti birinshi betine Jambyl oblysyndaǵy «Jol kartasynyń» júzege asyrylý barysy týraly maqalany shyǵarypty. Onda sheneýnikterdiń baıandaýynda bári jaqsy bolǵanymen, quqyq qorǵaý organdary birqatar zańbuzýshylyqtardy anyqtaǵany, sonymen qatar oblysta qant qyzylshasynyń túsimi tómendep, soǵan baılanysty Respýblıkada qant tapshylyǵy bilinýi múmkindigi aıtylǵan.
