«Shabyt» shyǵarmashyl jastar festıvaline ótinimder qabyldaý bastaldy
ASTANA. QazAqparat - Astanada «Shabyt» halyqaralyq shyǵarmashyl jastar festıvaline ótinimder qabyldaý bastaldy. Bıyl daryndy jastar bes nomınatsııa boıynsha básekege túsetin bolady, dep habarlaıdy QazAqparat.
Bıyl baıqaý «Klassıkalyq mýzyka», «Halyq mýzykasy», «Estradalyq vokal», «Horeografııa» jáne «Jýrnalıstıka» atalymdary boıynsha ótedi.
Uıymdastyrý komıtetiniń sheshimimen «Klassıkalyq mýzyka» nomınatsııasynda kelesideı ishki nomınatsııalar bolady: «Úrmeli aǵash aspaptar», «Mys úrmeli aspaptar», «Soqpaly aspaptar», «Kameralyq ansambl».
«Halyq mýzykasy» nomınatsııasynda jeńimpazdar «Qobyz», «Prıma qobyz», «Sherter», «Bas sherter», «Prıma dombyra» atalymdary boıynsha anyqtalsa, «Horeografııa» nomınatsııasynda tek halyq bıin oryndaýshylar óner kórsetedi.
Al «Jýrnalıstıka» nomınatsııasyna eki baǵyt qosyldy - «Televıdenıe» jáne «Internet resýrstar». Aıta keteıik, «Jýrnalıstıka» «Shabyt» festıvaliniń baǵdarlamasynda sońǵy ret 6 jyl buryn bolǵan. Bıyl Astananyń 20 jyldyǵyn merekeleýge oraı atalǵan nomınatsııa qaıta engizildi. Baıqaýǵa mereıtoılyq dataǵa jáne elordaǵa arnalǵan televızııalyq baǵdarlamalar, derekti fılmder (hronometrajy 20 mınýttan aspaıtyn) jáne Internet resýrstardaǵy jarııalanymdar qatysady.
Bıyl baıqaý 5-9 qarasha aralyǵynda Beıbitshilik jáne kelisim saraıynda ótedi. Ótinimderdi qabyldaý 25 qazanǵa deıin jalǵasady.
«Shabyt» halyqaralyq shyǵarmashyl jastar festıvali bıyl 21-shi ret ótkiziledi. Osy kúnge deıin ónerdiń túrli janrynda 10 myńnan astam adam qatysty. Ár jyldary festıvaldiń bas júldesi tanymal ázilkesh Tursynbek Qabatovqa, aqyn Qalqaman Sarınge, balet artısi Áıgerim Beketaevaǵa, opera ánshisi Aıgúl Nııazovaǵa, «Melomen» tobyna, Asha Mataıǵa, belgili ánshi ári kompozıtor Qaırat Baekenovke jáne basqa da ataqty tulǵalarǵa tabystalǵan bolatyn.
Eske salaıyq, ótken jyly «Shabyt» HH Halyqaralyq shyǵarmashyl jastar festıvalinde Qazaqstan Respýblıkasy Prezıdentiniń kýbogyn skrıpkashy Jibek Mýsýrgalıeva jeńip aldy.
Ár nomınatsııa boıynsha qatysý sharttaryn www.shabyt.astana.kz jáne Astana qalasy mádenıet jáne sport basqarmasynyń www.madeniet-sport-astana.kz saıttarynan bilýge bolady.
