«Shabyt» festıvaliniń Prezıdent kýbogy ıegeri belgili boldy
ASTANA. QazAqparat - «Shabyt» halyqaralyq shyǵarmashyl jastar festıvalinde Prezıdent kýbogy goboıshy Islam Álıevke buıyrdy. Odan bólek, jeńimpaz «Klassıkalyq mýzyka: aǵash úrmeli aspaptar» atalymynyń Gran-prıin jeńip aldy, dep habarlaıdy QazAqparat tilshisi.
Osymen 21-inshi ret uıymdastyrylyp, 5 kúnge sozylǵan óner básekesi óz máresine jetti.
Astanadaǵy «Beıbitshilik jáne kelisim» saraıynda ótken baıqaý jeńimpazdary men júldegerlerin quttyqtaý rásimimen qatar, jeńimpazdardyń qatysýymen gala-kontsert uıymdastyryldy.
«Mýzykamen 7 jasymnan bastap aınalysamyn. Qazir Astanadaǵy Óner ýnıversıtetiniń mýzyka fakýltetiniń 3 kýrs stýdentimin. Jeńisimdi ata-anama arnaımyn. «Shabyt» festıvaline osymen 2-inshi ret qatysýym osydan eki jyl buryn osy nomınatsııada ІІІ oryn ıelendim», -dedi festıvaldiń absolıýtti jeńimpazy, Prezıdent kýbogynyń ıegeri Islam Álıev.
«Klassıkalyq mýzyka» atalymynda qatysýshylar 4 sektsııada sheberlik baıqasty: aǵash jáne mys úrmeli aspaptar, soqpaly aspaptar jáne kameralyq ansamblder.
Meıirjan Keńesbaev, Aııa Ǵabbasova, Leonıd Mysovskıı, Baǵjan Esirkep engen kvartet úzdik kameralyq ansambl (Gran-prı) dep tanyldy.
«Klassıkalyq mýzyka: mys úrmeli aspaptar» sektsııasynda Azat Ábilqasymov top jardy. Aǵash aspaptarda oınaýda Tilek Dáýitqan men Vladımır Ardashev kósh bastasa, «Soqpaly aspapta» Arystan Ábildın Gran-prı ıelendi.
Ústimizdegi jyly «Halyq mýzykasy» nomınatsııasy kelesi sektsııalardan quryldy: «qobyz», «prıma-qobyz», «dombyra-prıma, sherter, bas-sherter».
Baıqaý qorytyndysy boıynsha Sholpan Sharapatova úzdik qobyzshy atanyp, Gran-prı enshiledi.
«Dombyra-prıma, sherter, bas-sherter» atalymynda Gran-prı Ádilhan Godjanovqa buıyrdy.
«Prıma-qobyzda» qazylar alqasy Aıym Meıirhanovanyń ónerine joǵary baǵasyn berdi.
Festıvaldiń úzdik vokalısi Gran-prıin astanalyq Ahmet Sultan ıelendi.
«Horeografııa» atalymynda Gran-prı qazylar alqasynyń biraýyzdan qabyldaǵan sheshimimen elordalyq «Naz» bı teatryna berildi.
Jýrnalıstıka nomınatsııasy boıynsha Qazaqstan ulttyq telearnasynyń "Məsele" baǵdarlamasynyń júrgizýshisi, jýrnalıst Nartaı Sərsenǵalıevtiń baǵy jandy. 
Halyqaralyq óner baıqaýynyń Prezıdent kýbogy ıegeri, Gran-prı ıegerleri men júldeli oryn alǵandar aqshalaı syılyqtarmen jáne «Shabyt» festıvaliniń dıplomdarymen marapattaldy. Onyń ishinde, Prezıdent kýbogy júldesine - 600 myń teńge, Gran-prı - 350 myń teńge, birinshi oryn - 300 myń teńge, ekinshi oryn - 250 myń teńge jáne úshinshi orynǵa 200 myń teńge berildi. Sonymen qatar, ataýly syılyq ıegerlerine 80 myń teńge kóleminde syıaqy tabystaldy.
Buǵan deıin habarlaǵanymyzdaı, kúndiz baıqaýdyń І, ІІ,ІІІ oryn ıegerleri marapattalǵan bolatyn.
